अर्थसंकल्पीय अधिवेशनात सरकारने घोषणा केल्यानंतर १७ मार्च पासून सवलत देण्याचा सरकारकडून शासन निर्णय (GR) काढण्यात आला आहे.यामुळे आता महिलांना प्रवासात ५० टक्के सवलत मिळणार आहे, मात्र या सवलती सोबत प्रवास करणाऱ्या महिलांना प्रवासासाठी रिझर्वेशन मिळेल की विना आरक्षण प्रवास करावा लागेल,एसी बसने प्रवास करतांना सुद्धा ५० सवलत असेल की फक्त नॉन एसी बस? असे अनेक प्रश्न सर्वसामान्य व्यक्तीला पडलेला आहे तर जाणून घेवू संपूर्ण माहिती. ज्यामुळे तुम्हाला पुढचा प्रवास करणं होईल सुकर…
महिला सन्मान योजना ; सवलतीचे नियम व अटी
सर्व महिलांना सर्व प्रकारच्या बसेसमध्ये तिकिटावर ५० टक्के सवलत देण्यात आली आहे आता यामध्ये साधी, मिनी बस, निमआराम म्हणजेच वातानुकुलीत गाडी, विनावातानुकुलित शयन-आसनी म्हणजे नॉन एसी स्लिपर कोच एसटी बस, आणि शिवशाही, शिवनेरी, शिवाई या तीनही साध्या आणि एसी बसमध्ये ५० टक्के सवलत १७ मार्चपासून लागू करण्यात आली आहे.
तिकिटाचा रंग वेगळा असणार…
५० टक्के सवलतीच्या दराने प्रवास करणाऱ्या महिलांच्या तिकिटाचा रंग वेगळा असणार आहे.महत्वाचे म्हणजे भविष्यात एसटी महामंडळात नव्याने दाखल होणाऱ्या सर्व प्रकारच्या बसेसकरताही ही सवलत लागू असणार आहे.
या दरांचा तिकिटात असेल समावेश …
महिलांना सरसकट ५० टक्के सवलत देण्यात आली असली तरि प्रवासी भाड्यातील अपघात साहाय्यता निधी आणि एसी बससेवांकरीता वस्तु व सेवाकरची रक्कम आकारण्यात येणार. म्हणजे तुमचं तिकीट वीस रुपये असेल तर त्यावर तु्म्हाला दहा रुपये सवलत मिळेल आणि त्यावर जो कर असेल. अर्थात तुमच्या तिकिटात कराचा समावेश असेल.
राज्यभर सवलत लागू….
या सवलतीत महिला राज्यभर कुठेही प्रवास करू शकता. राज्यातील संपूर्ण जिल्ह्यांपैकी कुठेही फिरू शकता, मात्र राज्याबाहेर जायचे असेल तर तुम्हाला तिकीटाचा आहे तो दर द्यावा लागेल. महाराष्ट्राच्या हद्दीपर्यंतच ही सवलत लागू होणार, तिथून पुढे पूर्ण तिकीट आकारले जाईल.
शहरी वाहतुकीला सवलत लागू नाही…
प्रवासी तिकिटावर ५० टक्के सवलत शहरी वाहतुकीस महिलांना मिळणार नाही, म्हणजे तुम्ही शहरातल्या शहरात एसटीने प्रवास करत असाल तर तुम्हाला ही योजना लागू होणार नाही.
