आम्ही कोणाच्या भरवशावर राहायचे?’

बँकेत ठेवलेली रक्कम परत मिळेल का या चिंतेने ग्रासलेले ग्राहक अस्वस्थ झाले होते. बँक अधिकारी, कर्मचारीही ग्राहकांच्या प्रश्नांना तोंड देताना हतबल झाले होते. हळूहळू शाखेत येणाऱ्या ग्राहकांची संख्या वाढत गेली आणि तणाव निर्माण होतो की काय, असे चित्र दिसू लागले होते. पोलिसांच्या गाड्या तातडीने शाखांमध्ये आल्या. पोलिस अधिकाऱ्यांनीही संतप्त ग्राहकांची समजूत काढण्याचा प्रयत्न केला. मात्र, ग्राहकांचा संताप अनावर झाल्याचे दृश्य तिथे होते. ‘आम्ही बँकेच्या भरवशावर हजारो रुपये ठेवलेत, ते आता आम्हाला मिळणार का?’, असा संतप्त सवाल विचारला जात होता.
बोरिवली पूर्वेतील शांतीवन परिसरातील बँक शाखेकडे ग्राहकांची प्रचंड गर्दी लोटली. इंदुलकर, राजेश जोशी यांच्यासह शेकडो ग्राहक तिथे जमले होते. अनेकांनी बँक अधिकाऱ्यांना जाब विचारण्याचा प्रयत्न केला तरीही काहीही साध्य झाले नाही. आयुष्यभर कमावलेली रक्कम बँकेत ठेवतो आणि ती अचानक बंद होते तर करायचे काय, हा सर्वांचाच प्रश्न होता. या बँका विश्वासार्ह नसल्यास त्या सुरूच होणार नाहीत हे पाहावे. आम्हाला त्याची झळ का? असेही हे ग्राहक विचारत होते.