अमरावती : राज्यात महिलांसह तरुणीवर होणारे अत्याचाराचे प्रमाण कमी होत नसून त्यात लग्नाचे आमिष दाखवून एका तरुणीवर अत्याचार करण्यात आला आहे. तिच्यासोबत अनैसर्गिक कृत्यही करण्यात आल्याची धक्कादायक माहिती अमरावती जिल्ह्यातील नांदगाव पेठ ठाण्याच्या हद्दीत उघडकीस आली. याबाबत मुकेश सुभाषराव बोबडे (वय – ३२ रा. रहाटगाव) याच्यावर गुन्हा दाखल करण्यात आला आहे.
नेमकी घटना काय?
पीडित २७ वर्षीय तरुणी आणि मुकेश हे एकमेकांना ओळखतात. त्यामुळे त्यांचे एकमेकांच्या घरी येणे-जाणे सुरु होते. याच काळात त्यांचे प्रेमसूत जुळले. त्यानंतर मुकेशने तिला लग्न करण्याचे आमिष दाखवून वेगवेगळ्या ठिकाणी तिच्यासोबत शारीरिक संबंध प्रस्थापित केले. त्याने तिच्यासोबत अनैसर्गिक कृत्यही केले. त्यामुळे तिला त्रास होऊ लागला. तिला खासगी रुग्णालयात उपचार घ्यावे लागले. परंतु, त्यानंतरही मुकेश हा तिचे लैंगिक शोषण करीत राहिला.
दरम्यान, मुकेश हा आपल्याला सोडून दुसऱ्या मुलीशी लग्न करणार असल्याचं पीडित तरुणीला कळले. त्यामुळे तिने त्याला जाब विचारला. मात्र, त्याने तिला काहीही उत्तर न देता तिच्याशी लग्न करण्यास नकार दिला. आपली फसवणूक झाल्याचे लक्षात आल्यावर तिने आपल्यासोबत घडलेली आपबिती आईसह परिसरातील समाजसेविकांकडे कथन केली. त्यांनी धीर दिल्यानंतर पीडित तरुणीने नांदगाव पेठ ठाण्यात तक्रार दाखल केली. तक्रारीवरून पोलिसांनी आरोपी मुकेशविरुद्ध गुन्हा दाखल केला असून पुढील तपास सुरू आहे.
