नवी दिल्ली : गव्हाच्या वाढत्या किमतीपासून सर्वसामान्यांना दिलासा देण्यासाठी केंद्र सरकारने मोठी घोषणा केली आहे. केंद्रीय भंडारासारख्या सरकारी आऊटलेट्सवर आता कमी किमतीत पीठ उपलब्ध होईल, असा निर्णय सरकारने घेतला आहे. केंद्रीय भंडार येथे फक्त २९.५० रुपये किलो दराने पीठ उपलब्ध होणार आहे. हे पीठ भारत आटा ब्रँडचे असेल. अन्न सचिव संजीव चोप्रा यांनी पिठाच्या वाढत्या किमतींचा आढावा घेतला होता, त्यानंतर हा निर्णय घेण्यात आला असून पिठाचा पुरवठा वाढवण्याच्या सूचना देण्यात आल्या आहेत. मोबाईल व्हॅनद्वारेही पीठ लोकांपर्यंत पोहोचवले जाईल, असेही अन्न सचिवांनी सांगितले. त्याची व्यवस्था केली जाईल. अन्न सचिवांच्या म्हणण्यानुसार, पिठाचे नाव आणि किंमत ठळक अक्षरात लिहावी लागेल. 6 फेब्रुवारीपासून NCCF आणि NAFED सुद्धा याच दराने पीठ विकणार आहेत.
किती रुपयात पीठ मिळेल?
हे जाणून घ्या की केंद्र सरकारने सहकारी संस्था, सरकारी PSU, केंद्रीय भंडार, NAFED आणि NCCF सारख्या महासंघांसाठी 23.50 रुपये प्रति किलो दराने 3 लाख टन गव्हाचे पीठ राखून ठेवले आहे. सरकारी आऊटलेट्सवर भारत आटा कमाल 29.50 रुपये प्रति किलो दराने विकला जाऊ शकतो.
मोबाईल व्हॅनद्वारे पीठ विकले जाईल
विशेष म्हणजे अन्न सचिवांनी केंद्रीय भंडार, नाफेड, एफसीआय आणि एनसीसीएफ यांची भेट घेतली. यानंतर त्यांनी निर्णय घेतला की या संस्था एफसीआय डेपोतून 3 लाख मेट्रिक टन गहू उचलतील. त्यानंतर या गव्हाचे पिठात रूपांतर होईल. त्यानंतर विविध किरकोळ दुकाने आणि मोबाईल व्हॅनद्वारे ग्राहकांना 29.50 रुपये किलो दराने पीठ विकले जाईल.
गव्हाचे लिलाव सुरू झाले
गव्हाची किंमत कमी करण्यासाठी केंद्र सरकारने गव्हाचा लिलाव सुरू केला आहे. 22 राज्यांमध्ये लिलावाच्या पहिल्या दिवशी 8.88 लाख मेट्रिक टन गव्हाची विक्री झाली. गुरुवारी राजस्थानमध्येही बोली लावण्यात आली. मार्चच्या दुसऱ्या आठवड्यापर्यंत देशभरात दर बुधवारी ई-लिलावाद्वारे गव्हाची विक्री सुरू राहणार आहे.
