मुंबई : महाराष्ट्राची भूमी ही नैसर्गिकदृष्ट्या संपन्न आहे. येथे विविध प्रकारची संपदा आढळून येते. राज्यात आता दोन जिल्ह्यांमध्ये सोन्याच्या खाणी (Gold Mines) आढळून आल्या आहेत. त्यामुळे राज्यासाठी खूप मोठी उपलब्धी असून, राज्यात खनिकर्म क्षेत्राला मोठा वाव मिळू शकतो. महाराष्ट्राच्या भूर्गाभात कोळसा, बॉक्साईट, आर्यन यासारख्या खनिजांबरोबरच सोनेही दडले असल्याची माहिती केंद्र सरकारच्या खनिकर्म विभागाच्या अहवालातून समोर आली आहे.
राज्याच्या खनिकर्म विभागातील सुत्रांकडून मिळालेल्या माहितीनुसार, चंद्रपूर जिल्ह्यातील मिंझरी आणि बामणी या भागात भूर्गभात सोन्याचे दोन खाणी आढळून आल्या आहेत. या भागात भूर्गाभात तांबेही असून या भागातून सोनेही मोठ्या प्रमाणात मिळू शकते. दुसरीकडे कोकणातीलत सिंधुदुर्ग जिल्ह्यामध्येही भूगर्भात सोने असल्याची शक्यता असून त्यादृष्टीने खनिकर्म विभागाने चाचणी सुरू केल्याची माहिती दिली आहे.
GSI ने केला होता सर्वे
GSI अर्थात भुवैज्ञानिक सर्वेक्षण ऑफ इंडियानं विदर्भाच्या जमिनीचा सर्वे केला होता. GSI च्या संशोधकांनी दिलेल्या अहवालात पूर्व विदर्भातील नागपूर, भंडारा आणि गडचिरोलीच्या भूगर्भात सोन्याचा साठा आढळून आला. त्यानुसार 1984-85 मध्ये नागपूर जिल्ह्यातल्या भिवापूरमधील पुल्लर, परसोरी, थूतानबोरी आणि गडचिरोलीत सर्वेक्षणही करण्यात आलं. विदर्भाचा भाग हा आर्थिकदृष्ट्या मागासलेला आहे अशी ओरड नेहमीच असते. मात्र विदर्भाच्या कुशीत दडलेला सोन्याचा साठा सापडला तर महाराष्ट्रात आणि पर्यायानं पुन्हा एकदा आपल्या देशात सोन्याचा धूर पाहायला मिळेल यात शंका नाही.
राज्यात खनिकर्म क्षेत्राला मोठा वाव
मुख्यमंत्री एकनाथ शिंदे यांनी मुंबईतील ताज हॉटेलमधील खाण क्षेत्रातील संधी या गुंतवणूकदारांच्या परिषदेत राज्यात सोन्याच्या खाणी असल्याचा उल्लेख केला होता. राज्यात खनिकर्म संशोधन संस्था सुरू करून या व्यवसायातील अडचणी दूर करून राज्याच्या महसुलासह रोजगारात वाढ झाली पाहिजे, असे मुख्यमंत्री म्हणाले. राज्यात सोन्याचे दोन ब्लॉक असल्याची माहिती केंद्रीय अधिकाऱ्यांनी आपल्याला दिली आहे. आमच्या काळात हे सोने निघाले तर ती राज्यासाठी खूप मोठी उपलब्धी असेल. राज्यात खनिकर्म क्षेत्राला मोठा वाव असून गडचिरोलीसारख्या दुर्गम भागात देशातील सर्वात मोठा स्टील प्रकल्प सुरू करू शकतो, असा विश्वासही मुख्यमंत्री एकनाथ शिंदे यांनी व्यक्त केला आहे.
