मुंबई – महाराष्ट्रात घडत असलेल्या वेगवान राजकीय घडामोडींकडे अवघ्या देशाचे लक्ष लागले असताना याच धामधुमीत मुख्यमंत्री देवेंद्र फडणवीस यांनी राज्यातील नुकसानग्रस्त शेतकऱ्यांना आणखी ५ हजार ३८० कोटींची आर्थिक मदत देण्याची घोषणा केली आहे. या निधीस आज मंजुरी देण्यात आली आहे. मुख्यमंत्र्यांनी ट्विटरच्या माध्यमातून ही माहिती दिली.
मुख्यमंत्री देवेंद्र फडणवीस आणि उपमुख्यमंत्री अजित पवार यांनी रविवारी वर्षा निवासस्थानी शेतकऱ्यांना आर्थिक मदत देण्याबाबत चर्चा केली होती. अवकाळी पावसामुळे महाराष्ट्रातील शेतकऱ्यांचे अतोनात नुकसान झाले असून या शेतकऱ्यांना अधिकची मदत मिळावी, यावर या चर्चेत एकमत झाले होते. आज मुख्यमंत्री फडणवीस यांच्या अध्यक्षतेखाली झालेल्या बैठकीत राज्याचे मुख्य सचिव तसेच अर्थ सचिवांशी झालेल्या चर्चेअंती नुकसानग्रस्त शेतकऱ्यांना आणखी ५ हजार ३८० कोटींची आर्थिक मदत देण्याचा निर्णय घेण्यात आला. या निधीस मुख्यमंत्री फडणवीस यांनी तातडीने मंजुरी दिली.
दरम्यान, केंद्र सरकारच्या पथकाने नुकतीच महाराष्ट्रातील अवकाळीग्रस्त भागाची पाहणी केली आहे. राज्यातील विविध पक्षांनी अवकाळीग्रस्त शेतकऱ्यांना तातडीने मदत मिळावी, अशी आग्रही मागणी लावून धरली होती. त्यातच अवकाळीग्रस्त भागाची प्रत्यक्ष पाहणी केल्यानंतर राष्ट्रवादी काँग्रेसचे अध्यक्ष शरद पवार यांनी राजधानी दिल्लीत जाऊन पंतप्रधान नरेंद्र मोदी यांची भेट घेतली होती व नुकसानीची वस्तुस्थिती त्यांनी पंतप्रधानांसमोर मांडली होती. त्यानंतर केंद्रीय गृहमंत्री अमित शहा यांच्याशी पंतप्रधान मोदी यांनी याबाबत चर्चा केली होती. या सगळ्या पार्श्वभूमीवर आता राज्य सरकारकडून शेतकऱ्यांसाठी आणखी ५ हजार ३८० कोटींचा आर्थिक निधी मंजूर करण्यात आल्याने शेतकऱ्यांना दिलासा मिळणार आहे.
