पुणे – रस्ते अपघाताचे प्रमाण दिवसेंदिवस वाढतच आहे. यात अनेकांना आपला जीव गमवावा लागतोय. अशातच ऊसाच्या ट्रॉलीखाली सापडून गर्भवती महिलेचा जागीच मृत्यू झाल्याची धक्कादायक घटना पुण्यातील जुन्नर तालुक्यात घडलीय. महिलेच्या मृत्यूनं हळहळ व्यक्त करण्यात येत असून कुटुंबावर दु:खाचा डोंगर कोसळला आहे.
नेमकी काय आहे घटना?
विद्या कानसकर असं मृत महिलेचं नाव आहे. विद्या या पती आणि आईसह नारायणगाव येथे उपचारासाठी गेल्या होत्या. त्याठिकाणाहून परतताना ही दुर्दैवी घटना घडली. रस्त्यात स्पीडब्रेकर आला म्हणून विद्या गाडीवरून खाली उतरल्या पण तितक्यात समोरून येणाऱ्या ऊसाच्या ट्रॉलीचा विद्याला धक्का लागला आणि ती खाली पडली. काही कळण्याच्या आत विद्याच्या डोक्यावरून ट्रॉलीचं चाक गेले. तिला उपचारासाठी दवाखान्यात नेण्याआधीच तिचा मृत्यू झाला. या अपघातानंतर स्थानिकांनी संताप व्यक्त केला.
नारायणगाव-सावरगाव रस्त्यावरील वारूळवाडी येथे ही घटना घडली. या घटनेमुळे मृत महिलेचं बाळंतपणाचं स्वप्न अपूर्ण राहिलं. जग पाहण्याआधीच बाळाचा काळ आला. या अपघातानंतर विद्याचे पती रमेश कानसकर यांनी पोलीस ठाण्यात तक्रार दिली असून पोलिसांनी ट्रॅक्टर चालकाला ताब्यात घेतले आहे. गोरख ढेबरे असं या आरोपी चालकाचं नाव आहे. या घटनेने स्थानिकांनी प्रशासनाला दोषी धरत अधिकाऱ्यांविरोधात संताप व्यक्त केला आहे. गेल्या अनेक वर्षापासून रस्त्यावर साईड पट्ट्या लावल्या नाहीत. त्यामुळे दुचाकी घसरून अपघात होतात. प्रशासन आणखी किती जीव घेणार असा सवाल स्थानिक विचारत आहेत.
