ठाणे-विनापरवानगी सभा आणि बैठकांचे आयोजन, वाहनांवरील प्रचार आणि निवडणूक खर्चांवर लक्ष ठेवण्यासाठी ठाणे जिल्ह्यात केंद्रीय निवडणूक आयोगाकडून नियुक्त करण्यात आलेले खर्च निरीक्षक दाखल झाले आहेत. प्रत्येक प्रचारावर आयोगाकडून लक्ष ठेवण्यात येणार असून त्यासाठी व्हिडीओ पथके व भरारी पथकांची सक्रीय व्यवस्था करण्याची सूचना त्यांनी दिली आहे. विधानसभा निवडणूक काळात उमेदवारांच्या खर्चाच्या अनुषंगाने केंद्रीय निवडणूक निरीक्षकांनी दिलेल्या सूचनांचे संबंधित यंत्रणांनी काटेकोरपणे पालन करावे, असे निर्देश जिल्हाधिकारी तथा निवडणूक निर्णय अधिकारी राजेश नार्वेकर यांनी शनिवारी दिले.
विनापरवानगी कुठलीही सभा, बैठका होणार नाही याची दक्षता घ्यावी. तसेच प्रचाराच्या वाहनांवर विशेष लक्ष ठेवण्याच्या सूचनाही त्यांनी यावेळी केल्या. राजकीय पक्षाच्या व उमेदवाराच्या सभा आणि कॉर्नर सभांचे चित्रिकरण करणे आवश्यक असल्याचे या बैठकीत सांगण्यात आले. व्हिडीओ पथक व भरारी पथकांना सक्रीय ठेवण्याच्या सूचनाही यावेळी देण्यात आल्या. आयकर विभाग आणि लेखा विभागाने योग्य ती खबरदारी घेऊन काम करावे, विविध मार्गाने येणार्या मद्य वाहतुकीवर उत्पादन शुल्क विभागाने पायबंद घालावा, असे निर्देश देण्यात आले. विविध समिती प्रमुखांनी यावेळी समित्यांच्या कामाची माहिती दिली. या बैठकीला उपजिल्हा निवडणूक अधिकारी अपर्णा सोमाणी तसेच समित्यांचे अधिकारी उपस्थित होते. भिवंडी ग्रामीण, पूर्व आणि पश्चिम मतदारसंघासाठी विवेकानंद, शहापूर, कल्याण पश्चिम आणि मुरबाडसाठी आशिषचंद्र मोहंती, अंबरनाथ, उल्हासनगर आणि कल्याण पूर्वेसाठी एस. आर. कौशिक, डोंबिवली, कल्याण ग्रामीण आणि ठाण्यासाठी शिवस्वरूप सिंग तर मिरा-भाईंदर, ओवळा-माजिवडा आणि कोपरी-पाचपाखाडीसाठी उमेश पाठक यांची नियुक्ती करण्यात आली आहे. त्यांनी विधानसभा क्षेत्रनिहाय आढावा घेऊन काही महत्त्वपूर्ण सूचना दिल्या.
