पुणे – मनसे अध्यक्ष राज ठाकरे यांनी घुसखोरांविरोधात काढलेला मोर्चा यशस्वी ठरल्याची चर्चा सुरू असतानाच राष्ट्रवादी काँग्रेसचे अध्यक्ष शरद पवार यांनी राज यांना गांभीर्याने घेण्याची गरज नाही, अशी प्रतिक्रिया व्यक्त केली आहे.
दिल्ली विधानसभा निवडणुकीच्या पार्श्वभूमीवर प्रतिक्रिया व्यक्त करताना शरद पवार यांनी राज ठाकरे यांना हा टोला लगावला आहे. राज यांनी दगडाचं उत्तर दगडाने आणि तलवारीचं उत्तर तलवारीने दिलं जाईल, असा इशारा दिला होता. राज यांच्या या वक्तव्याला या निकालाचा काही इशारा आहे का? असा सवाल पवार यांना विचारण्यात आला. त्यावर ‘राज ठाकरे यांना गांभीर्यानं घेण्याची गरज नाही. काही लोक त्यांचं भाषण ऐकायला येतात. काही लोक पाहायला येतात,’ असा पवारांनी लगावला.
राज यांनी मुंबईत घुसखोरांविरोधात मोठा मोर्चा काढला होता. यावेळी त्यांनी हिंदुत्वाच्या दिशेने पुढील राजकीय वाटचाल करण्याचे संकेत दिले होते. या पार्श्वभूमीवर पवार यांनी हे वक्तव्य केल्याने त्याला महत्त्व आलं आहे. पवारांच्या या वक्तव्यावर मनसेकडून काय उत्तर येतं याकडे संपूर्ण महाराष्ट्राचं लक्ष लागलं आहे.
काँग्रेस नेते राहुल गांधी यांनी निवडणूक प्रचारात दंडुक्याची भाषा केली होती. ती योग्य होती का? असा सवालही पवारांना विचारण्यात आला. त्यावर ती निवडणूक प्रचारातील भाषा होती. पण तरीही राहुल यांनी तसं वक्तव्य करायला नको होतं. राहुल यांचं ते वक्तव्य चुकीचं होतं, असं पवारांनी स्पष्ट केलं.
