मुंबई- काँग्रेस आणि राष्ट्रवादी काँग्रसची आघाडी होत असल्याने विधानसभा निवडणूक लढण्यास शिवसेना व भाजपमधील इच्छुकांनी चाचपणी सुरू केली असली तरी युती घोषित होत नसल्याने या इच्छुकांची मनस्थिती तळ्यात मळ्यात अशीच आहे. सोमवारपर्यंत काय तो अंतिम निर्णय घ्या, असे त्यांना राष्ट्रवादी आणि काँग्रेसच्या नेत्यांनी सांगितले आहे.
धनंजय मुंडे यांच्या बंगल्यावर गेले काही दिवस इच्छुकांच्या मुलाखती सुरू असून या ठिकाणी शिवसेनेतील व भाजपमधील अनेक नेते व कार्यकर्त्यांची ये जा वाढली आहे. काँग्रेस प्रदेशाध्यक्ष बाळासाहेब थोरातांच्याही मागे या इच्छुकांपैकी अनेकजणांनी तिकिटासाठी गेले काही दिवस लकडा लावला होता. मात्र युतीची घोषणा लांबत असल्याचे पाहून यातील अनेक जण आता आस्ते कदमच्या स्थितीत आले आहेत.
शिवसेना व भाजपमध्ये काँग्रेस-राष्ट्रवादीमधून अनेक दिग्गज गेले आहेत. ज्या मतदारसंघांमध्ये शिवसेना व भाजपच्या कार्यकर्त्यांनी निवडणूक लढण्याची गेली काही वर्षे तयारी केली होती त्यांच्यात काँग्रेस आणि राष्ट्रवादीमधून आलेला नेत्यांचा लोंढा पाहून नाराजीचा सूर उमटू लागला होता. काँग्रेस राष्ट्रवादीमधून आलेल्या या नेत्यांसाठी अंथरला जाणारा लाल गालिचा पाहून त्यातील बहुतांश नेत्यांना निवडणुकीची उमेदवारी मिळणार असल्याचे सेना भाजपमधील कार्यकर्त्यांना वाटू लागले आहे. त्यामुळे त्यांनी काँग्रेस आणि राष्ट्रवादीमध्ये चाचपणी सुरू केली होती. मात्र निवडणुकीच्या तारखेची घोषणा होऊनही युतीच्या बाजूने कोणतीही घोषणा होत नसल्याने या नेत्यांमध्ये अस्वस्थता पसरली आहे. युती न झाल्यास सेना व भाजप या दोन्ही पक्षांमध्ये तिकीट मिळण्याच्या संधी अधिक उपलब्ध होऊ शकतात. एखाद्या मतदारसंघात काँग्रेस वा राष्ट्रवादीमधून आलेल्या नेत्याला तिकीट मिळणार असेल, तर त्याच्या शेजारील मतदारसंघातून तरी इच्छुकाला लढण्याची संधी युती न झाल्यास मिळू शकते. त्यामुळे युतीची घोषणा लांबल्याने या इच्छुकांमध्ये अस्वस्थता आहे.
प्रामुख्याने ठाणे, मुंबईतील काही ठराविक मतदारसंघातील नेते व कार्यकर्ते, मराठवाडा, पश्चिम महाराष्ट्र, उत्तर महाराष्ट्र या विभागातील नेते व कार्यकर्ते यांची गेले काही दिवस काँग्रेस-राष्ट्रवादीच्या नेत्यांच्या घरी वा कार्यालयांमध्ये वाढलेली ये-जा थांबल्यामुळे त्यांच्या नावाचा ज्या मतदारसंघातून उमेदवारी देण्याचा विचार राष्ट्रवादी व काँग्रेसचे नेते करत होते, त्यांच्यापुढेही मोठे प्रश्नचिन्ह उभे राहिले आहे. उद्यापर्यंत जर युतीची घोषणा झाली नाही, तर संबंधित इच्छुकांना अंतिम निर्णय घेण्यास सांगण्यात येईल, असे राष्ट्रवादी काँग्रेसच्या विधिमंडळातील एका नेत्याने सांगितले.
