मुंबई- विधानसभा निवडणुकीचा उमेदवारी अर्ज भरण्यास शनिवारपासून सुरुवात होणार असून अद्यापही शिवसेना-भाजपमधील जागा वाटपाचा तिढा सुटलेला नाही. त्यामुळे युतीचे मित्रपक्ष अस्वस्थ झाले आहेत. त्यातच कृषी राज्यमंत्री सदाभाऊ खोत यांच्या नेतृत्वाखालील रयत क्रांती संघटनेने भाजपकडे १२ जागांची मागणी केली असून खोत यांनी इस्लामपूर मतदारसंघातून निवडणूक लढवण्याची तयारीही सुरू केल्याचं सूत्रांनी सांगितलं. दरम्यान, खोत यांनी १२ जागांची मागणी केल्याने भाजपसमोरच्या अडचणीत वाढ होण्याची शक्यता वर्तवण्यात येत आहे.
सदाभाऊ खोत यांनी भाजपकडे सांगलीतील इस्लामपूर-वाळवा, साताऱ्यातील उत्तर कराड, फलटण, सोलापुरातील पंढरपूर-मंगळवेढा, माढा, बुलडाण्यातील मेहकर, चिखली, नाशिकमधील येवला, साखरी, नांदेडमधील नायगाव, अहमदनगरमधील श्रीरामपूर आणि मुंबईतील मानखुर्द आदी विधानसभा मतदारसंघ रयतसाठी सोडण्याची मागणी केल्याचं सूत्रांनी सांगितलं. संकटकाळात मित्रपक्षांनी भाजपला साथ दिली आहे. त्यामुळे भाजपने मित्रपक्षाला समाधानकारक जागा दिल्या पाहिजेत, असं रयतच्या एका पदाधिकाऱ्याने सांगितले. भाजपने मित्रपक्षाला १८ जागा सोडण्याचा निर्णय घेतल्याचं केवळ वर्तमानपत्रातून वाचायला मिळालं. मात्र आम्हाला त्याबाबत कोणतीही सूचना भाजपकडून मिळालेली नसल्याचंही या पदाधिकाऱ्याचं म्हणणं आहे.
दरम्यान, खोत यांनी इस्लामपूर मतदारसंघातून निवडणूक लढण्याची तयारी सुरू केली आहे. तिथे त्यांना राष्ट्रवादीचे प्रदेशाध्यक्ष आणि आमदार जयंत पाटील यांच्याशी लढत द्यावी लागणार असल्याने इस्लामपूर विधानसभेच्या लढतीकडे संपूर्ण महाराष्ट्राचं लक्ष लागलं आहे.
दरम्यान, खोत यांनी इस्लामपूर मतदारसंघातून निवडणूक लढण्याची तयारी सुरू केली आहे. तिथे त्यांना राष्ट्रवादीचे प्रदेशाध्यक्ष आणि आमदार जयंत पाटील यांच्याशी लढत द्यावी लागणार असल्याने इस्लामपूर विधानसभेच्या लढतीकडे संपूर्ण महाराष्ट्राचं लक्ष लागलं आहे.
