मुक्ताईनगर : मुक्ताईनगर तालूक्यातील वादळग्रस्त पिकांची पाहणी करण्यासाठी गेलेले माजी मुख्यमंत्री व विरोधी पक्षनेते देवेंद्र फडणवीस यांचा ताफा अडवून आज एका शेतकऱ्यांने विष प्राशन करून आत्महत्या करण्याचा प्रयत्न केला. मुक्ताईनगर तालुक्यातील मेळसांगवे येथे मंगळवारी दुपारी १वाजेच्या सुमारास हा प्रकार घडला. योगेश पाटील असे आत्महत्येचा प्रयत्न करणाऱ्या शेतकऱ्याचे नाव आहे.
दुपारी फडणवीस यांच्या वाहनाचा ताफा त्याच्या शेताकडून जात होता. त्याचवेळी योगेश याने ताफा अडवून फडणवीस यांना आपल्या शेतात येवून पाहणी करावी, अशी विनंती केली. आपल्या शेतातील केळीचा नुकसान झाले आहे. आपला दौरा फोटोसेशनसाठी असल्याचा आरोप त्याने केला. यावेळी योगेश याने सोबत विषाचा डबा आणला होता. तो पोलिसांनी जप्त केला. यानंतर फडणवीस यांच्या वाहनाचा ताफा पुढे मार्गस्थ झाला.
फडणवीस पाहणी करतांना हा युवक जोरजोरात माझ्या शेतापर्यंत या, पाहणी करा, असा नाहीतर मी आत्महत्या करेन. असा सूर आवळत होता. त्यानंतर या तरुणाने देवेंद्र फडणवीस यांच्या ताफ्यातील गाड्या अडवत विष प्राशन करून आत्महत्या करण्याचा प्रयत्न केला.
