मुंबई- लोकसभा निवडणुकीत एकही उमेदवार उभा न करताही प्रचाराच्या केंद्रस्थानी राहणारे मनसे अध्यक्ष राज ठाकरे यांनी विधानसभा निवडणुकीत जवळपास 100 ते 125 उमेदवार उभे करीत निवडणूक लढविण्याचा निर्णय घेतल्याचे खात्रीलायकरित्या कळते.
येत्या दोन ते तीन दिवसांत मनसे उमेदवारांची यादी जाहीर करणार असून 5 ऑक्टोबरला मनसे प्रचाराचा नारळ फोडणार असल्याचेही कळते. राज यांच्या उपस्थितीत मनसेचा आज मुंबईत मेळावा होणार आहे. या मेळाव्यात सगळ्या प्रश्नांची उत्तरं मिळणार आहेत.
लोकसभा निवडणुकीत काँग्रेस-राष्ट्रवादी आघाडीत मनसे सहभागी होणार असल्याच्या सगळीकडे बातम्या पसरल्या असल्या, तरी प्रत्यक्षात मनसेने निवडणूकच लढवली नाही. मात्र, राज ठाकरे यांनी पंतप्रधान नरेंद्र मोदी आणि भाजपचे अध्यक्ष अमित शहा यांच्याविरोधातच प्रामुख्याने प्रचार केल्याने ते आघाडीच्या बाजूने असल्याच्याही चर्चेला तोंड फुटले होते. निवडणूक निकाल काँग्रेस-राष्ट्रवादीच्या विरोधात गेल्याने राज यांच्या प्रचाराचा आघाडीच्या उमेदवारांना कितपत उपयोग झाला, हा मुद्दाही निवडणुकीनंतर चर्चेच्या केंद्रस्थानी होता.
विधानसभा निवडणुका तोंडावर आल्या असतानाही मनसेकडून फारशी हालचाल दिसत नसल्याने मनसे निवडणूक लढविणार की नाही याविषयी बर्याच उलट सुलट चर्चा सुरू झाल्या होत्या. मात्र मनसे अध्यक्ष राज ठाकरे यांनी विधानसभा निवडणूक लढविण्याचा निर्णय घेतला असून येत्या एक ते दोन दिवसांत त्यांच्या उमेदवारांची पहिली यादी जाहीर होणार असल्याचे कळते. 5 ऑक्टोबरला राज ठाकरे प्रचाराचा नारळ फोडणार असून त्यांची पहिली सभा कुठे होणार, याविषयी मात्र अद्याप निर्णय व्हायचा आहे. मनसे निवडणूक लढविणार असल्याने त्यांच्या प्रचाराचा रोख नेमक्या कोणत्या दिशेने असणार, पुन्हा ते भाजपलाच ठोकणार की त्यांच्या निशाण्यावर काँग्रेस राष्ट्रवादी आघाडीही असणार याविषयी मात्र सर्वसामान्यांमध्ये उत्सुकता आहे.
