तिरुवनंतपुरम – चीनमध्ये हाहाकार माजवणाऱ्या करोना व्हायरसचा पहिला रुग्ण भारतात आढळला आहे. केरळमध्ये चीनहून परतलेल्या एका विद्यार्थ्याला करोना व्हायरसची लागण झाल्याचे स्पष्ट झाले आहे. हा विद्यार्थी वुहान विद्यापीठात शिक्षण घेत होता. या विद्यार्थ्याची प्रकृती स्थिर असून सध्या तो डॉक्टरांच्या देखरेखीखाली आहे. चीनमध्ये आतापर्यंत करोना व्हायरसने १७० जणांचा बळी घेतला आहे.
तर, गाझियाबाद आणि गुडगावमध्ये देखील संशयित रुग्ण असल्याची माहिती पुढे आली आहे. हे रुग्ण देखील नुकतेच चीनहून परत आले आहेत. या पूर्वी मुंबई, जयपूर, बिहारच्या छपरा येथे संशयित रुग्ण आढळले आहेत. तथापि, दिल्लीतील हॉस्पिटल आणि विमानतळांवर करोना संदर्भात तपासणीसाठीची सर्व व्यवस्था करण्यात आली आहे. विमानतळांवर याबाबत तपासणी होत असून दिल्लीच्या राम मनोहर लोहिया रुग्णालयात देखील तपासणीची व्यवस्था करण्यात आली आहे.
गुडगाव-गाझियाबादमध्ये ३ संशयित
बुधवारी दिल्लीत पोहोचलेल्या गुडगावच्या दोन लोकांची विमानतळावरच तपासणी करण्यात आली. त्यानंतर त्यांच्यावर प्राथमिक उपचार करण्यात आले. या रुग्णांना ताप आणि खोकला होत होता. याबाबतची माहिती तातडीनं जिल्हा आरोग्य विभागाला देण्यात आली. या बरोबरच गाझियाबादमध्येही एक संशयित रुग्ण आढळल्याची माहिती मिळत आहे. डॉक्टरांनी ८ दिवसांपूर्वी चीनहून आलेल्या इंदिरापुरममध्ये आपल्या भावाकडे आलेल्या एका तरुणीलाही करोना व्हायरसची लागण झाल्याचा संशय व्यक्त करण्यात येत आहे.
