मुंबईः – बृहन्मुंबई विद्युत पुरवठा आणि परिवहन (बेस्ट) उपक्रमाकडून करण्यात येणाऱ्या वीज दरवाढीला महाराष्ट्र नवनिर्माण सेनेने विरोध केला आहे. मनसे अध्यक्ष राज ठाकरे यांनी याप्रकरणी विद्युत नियामक आयोगाला पत्र दिले आहे, अशी माहिती सूत्रांकडून देण्यात आली आहे.
बेस्ट उपक्रमाच्या विद्युत विभागाला होणार नफा परिवहन विभागाला वळता करण्याचा प्रयत्न सुरू असल्याचे समजते. या प्रकाराला मनसेने आक्षेप घेतला आहे. बेस्टचा विद्युत विभाग कायम नफ्यात असतो. विद्युत विभागाचे काम चांगले आहे. मात्र, तुलनेने परिवहन विभाग कायम तोट्यात राहतो. त्यामुळे विद्युत विभागाल होणार नफा परिवहन विभागाला वळता करू नये, अशी मागणी राज ठाकरे यांनी दिलेल्या पत्रात करण्यात आली आहे. बेस्टच्या वीजदरवाढीवर फेरविचार करण्यात यावा, अशी सूचनाही राज ठाकरे यांनी या पत्रात केली आहे.
बेस्टच्या परिवहन विभागाला होणार तोटा भरून काढण्यासाठी विद्युत विभागाचा नफा परिवहन विभागाला वळता करण्याचा प्रयत्न सुरू असल्याचा दावा मनसेकडून करण्यात आला. त्याच पार्श्वभूमीवर राज ठाकरे यांनी विद्युत नियामक आयोगाला एक पत्र लिहिले. या प्रकाराबाबत मुंबई महानगर पालिकेचे आयुक्त प्रवीण परदेशी यांना विचारले असता, विद्युत विभागाचा नफा अशा प्रकारे वळता केला जाऊ शकत नाही. मुंबई उच्च न्यायालयाचे तसे आदेश आहेत. त्यामुळे नफा वळवण्याच्या चर्चांना आधार नसल्याचे परदेशी यांनी सांगितल्याचे समजते.
वीजदरवाढ करून मुंबईकरांवर आणखी बोजा टाकला जाऊ नये, असे मनसेचे म्हणणे आहे. दरम्यान, वीजदरवाढीच्या प्रस्तावावर कोणताही निर्णय घेण्यात आला नाही. मात्र, वीजदरवाढ करता येईल का, अशी विचारणा करणारे पत्र बेस्ट प्रशासनाने आयोगाला दिल्याची माहिती मिळाली आहे. विद्युत नियामक आयोगाच्या परवानगीशिवाय वीजदरवाढ करता येत नाही. त्यामुळे वीजदरवाढीवरून राजकारण तापणार असे दिसते. मुंबईकरांच्या खिशाला आणखी कात्री लागेल, हेदेखील पाहणे औत्सुक्याचे ठरणार आहे.
