धुळे: शिरपूरजवळील रुमित केमिकल्स कंपनीत झालेल्या भीषण स्फोटातील मृतांचा आकडा 13 वर पोहोचला आहे. स्फोटात एकूण 38 जखमी झाले असून त्यातील 9 जणांची प्रकृती चिंताजनक आहे. तर, 12 जण अद्यापही बेपत्ता आहेत. बॉयलरमध्ये शॉर्ट सर्किट होऊन स्फोट झाल्याची प्राथमिक माहिती आहे. अग्निशमन दलाच्या चार गाड्या घटनास्थळी दाखल झाल्या असून आग आटोक्यात आणण्याचे शर्थीचे प्रयत्न सुरू आहेत. मृतांचा आकडा वाढण्याची शक्यता व्यक्त करण्यात येत आहे.
शिरपूरमधील वाघाडी गावाजवळ ही केमिकल फॅक्टरी आहे. आज सकाळी या केमिकल कंपनी मोठा स्फोट झाला. हा स्फोट इतका भीषण होता की या स्फोटामुळे आजूबाजूच्या परिसराला मोठे हादरे बसले आणि स्फोटाचा आवाज सुमारे 15 किलोमीटरपर्यंत ऐकू गेला. आसपासच्या शेतात काम करणारे काही शेतमजूरही या स्फोटामुळे जखमी झाल्याचे सांगितले जात आहे. या हादर्यांमुळे आसपासच्या घरांनाही तडे गेल्याचे वृत्त आहे. या स्फोटाच्या आवाजाने परिसरातील लोकांमध्ये घबराट पसरली आहे. तसेच परिसरात धुरांचे लोटही वाढत असल्याचे दिसत आहे.
आतापर्यंत चार बॉयलर फुटले
मिळालेल्या माहितीनुसार, या फॅक्टरीत सहा बॉयलर असून आतापर्यंत चार बॉयलरचे स्फोट झाले आहेत. सुरक्षेच्या कारणाने आसपासच्या नागरिकांना सुरक्षित ठिकाणी हलविण्यात येत आहे.
आगीवर नियंत्रण मिळवण्याचे प्रयत्न सुरू
घटना घडल्यानंतर काही वेळातच शिरपूर अग्निशमन दलाच्या चार गाड्या दाखल झाल्या. मात्र, आग मोठी असल्याने शिरपूरबाहेरील अग्निशमन केंद्रांच्या आणखी गाड्या मागवण्यात आल्या आहेत. एनडीआरएफचे जवानही घटनास्थळी पोहोचले आहेत. बॉयलरचे एकामागोमाग एक स्फोट होत असल्याने आग नियंत्रणात आणणे कठीण होऊन बसले आहे.
