बोदवडमध्ये फसवणूक व अॅट्रॉसिटीचा गुन्हा दाखल; माजी मंत्र्यासह इतरांवर आरोप
बोदवड, ता. मुक्ताईनगर (जि. जळगाव), दि. ३० मार्च — बोदवड पोलीस ठाण्यात फसवणूक व अनुसूचित जाती-जमाती अत्याचार प्रतिबंधक कायद्यान्वये गंभीर गुन्हा दाखल करण्यात आला असून या प्रकरणात माजी मंत्री एकनाथराव खडसे, शारदा खडसे तसेच दुय्यम निबंधक कार्यालयातील तत्कालीन अधिकारी व कर्मचाऱ्यांवर आरोप करण्यात आले आहेत.दरम्यान काही दिवसापूर्वीचं पोलीस अधिकाऱ्यासोबत झालेल्या वादातून खडसे विरुद्ध गुन्हा दाखल करण्यात आला होता.
पोलीस सूत्रांकडून मिळालेल्या माहितीनुसार, गुन्हा क्रमांक ५४/२०२६ भारतीय न्याय संहिता (BNS 2023) मधील विविध कलमांसह अॅट्रॉसिटी कायद्यानुसार नोंदविण्यात आला आहे. ही घटना सन २००२ ते २०२५ या कालावधीत घडल्याचे फिर्यादीत नमूद आहे. गुन्ह्याची नोंद २९ मार्च २०२६ रोजी रात्री ११:५१ वाजता करण्यात आली.
या प्रकरणातील फिर्यादी चमेलीबाई तुकाराम तायडे (वय ८२, रा. मानपुर, ता. भुसावळ) यांनी दिलेल्या तक्रारीनुसार, आरोपींनी साखर कारखाना उभारण्याचे आमिष दाखवून त्यांची वतन जमीन फसवणुकीने हस्तगत केली. पुढे संबंधित जमीन बनावट कागदपत्रांच्या आधारे शारदा खडसे यांच्या नावे करण्यात आल्याचा आरोप करण्यात आला आहे.
तसेच, दुय्यम निबंधक कार्यालय, बोदवड येथील तत्कालीन अधिकारी व कर्मचाऱ्यांनी संगनमताने शासकीय दस्तऐवजांमध्ये फेरफार केल्याचेही फिर्यादीत नमूद करण्यात आले आहे.
या प्रकरणाचा तपास उपविभागीय पोलीस अधिकारी, फैजपूर विभागाचे प्रभारी श्री. अनिल बडगुजर यांच्याकडे सोपविण्यात आला असून पुढील तपास सुरू आहे. दरम्यान, या गुन्ह्यात अद्याप कोणालाही अटक करण्यात आलेली नाही.
या घटनेमुळे परिसरात खळबळ उडाली असून पुढील तपासाकडे सर्वांचे लक्ष लागले आहे.
