(प्रमोद सोनवणे)
भडगाव : तालुक्यातील बात्सर ते खेडगाव रस्त्याचे काम अत्यंत निकृष्ट पद्धतीने होत आहे. या रस्ता कामासाठीचे प्रस्तावित सर्व नियम धाब्यावर बसवून काम सुरू असल्याचा आरोप ग्रामस्थांकडून केला जात आहे. संबंधित अधिकारी कामावर येऊन नियमाप्रमाणे काम करण्याची सूचना देत नाही, तोपर्यंत काम न करण्याचा इशारा ग्रामस्थांनी दिलेला आहे.
बात्सर ते खेडगाव रस्त्याचे काम जिल्हा वार्षिक योजना ग्रामीण रस्ते विकास सर्वसाधरण कार्यक्रम ३०५४, २१३२ अंतर्गत मजबुतीकरण आणि डांबरीकरण असे मंजूर झाले असून त्यासाठी २५ लाख रुपये निधी मंजूर झाला आहे. संबंधित ठेकेदाराने बात्सर-खेडगाव रस्ता कामाला सुरूवातही केली होती. मात्र या रस्ता कामाचे प्रस्तावित सर्व नियम धाब्यावर बसवून काम करण्यात येत आहे. याबाबत ठेकेदारास आणि संबंधित अधिकारी यांना रस्त्याचे काम निकृष्ट होत असल्याचे सांगत योग्य पद्धतीने काम व्हावे, अशी अपेक्षा ग्रामस्थांची आहे. मात्र संबंधित ठेकेदार मनमानी पद्धतीने काम करत असल्याने ग्रामस्थांचा संताप अनावर झाला आहे.
अगोदरचा डांबरी रस्ता न कोरता किंवा त्यावर डांबर न टाकता जागोजागी पडलेले खड्डे न भरता कोणत्याही प्रकारे मंजूर नसलेल्या आकाराची दगडी खडी टाकून व वरून कमी प्रमाणात डांबर टाकत अगदीच निकृष्ट दर्जाचे काम सुरू होते. सध्या ते काम सद्यस्थितीला बंद असून अभियंता मात्र घटनास्थळी येण्यास ३ दिवसांपासून टाळाटाळ करत आहेत.
ठेकेदारास याविषयी जाब विचारला असता ठेकेदाराकडून उडवाउडवीची उत्तरे देत आहेत. या निकृष्ट कामाला विरोध करण्यासाठी बात्सर व खेडगाव ग्रामस्थांनी एकत्र येत काम बंद पाडले असून मंजूर कामाप्रमाणे काम करण्याची सूचना ठेकेदारास संबंधित अभियंता देत नाही तोवर काम होऊ देणार नाही, असा पवित्रा घेतला असून काम बंद करण्यात आले आहे.
