जळगाव, दि.२१ – शहरातील विकास कामांकरीता विविध योजने अंतर्गत शासनाने वितरीत केलेल्या निधीतून करण्यात येणार्‍या कामांना शासनाने स्थगिती दिली आहे. तत्कालीन मुख्यमंत्री देवेंद्र फडणवीस यांनी शहराच्या विकासासाठी 100 कोटींचा निधी मंजूर केला होता. 100 कोटींपैकी 42 कोटींच्या निविदा सार्वजनिक बांधकाम विभागाने निविदा प्रक्रिया सुरु केली होती. मात्र शासनाने विकास कामांकरीता दिलेल्या निधीतून करावयाच्या कामांना स्थगिती दिली होती. त्यामुळे त कामांना ब्रेक लागला होता. दरम्यान,शासनाने स्थगिती उठविली असल्याने कामे पुन्हा सुरू होणार असल्याची माहिती महापौर भारती सोनवणे यांनी दिली. दरम्यान, कामे सार्वजनिक बांधकाम विभागाकडून होणार असल्याने मुख्य अभियंत्यांची उद्या दि.२२ रोजी महापौरांसह काही नगरसेवक भेट घेणार आहे.
जळगाव शहराच्या विकासासाठी मंजूर झालेल्या 100 कोटींच्या निधीची स्थगिती शासनाने उठविली आहे. त्यामुळे शासनासह निधीसाठी पाठपुरावा करणारे माजी मंत्री आ.गिरीश महाजन यांचे आभार. शासनाने स्थगिती उठविल्यामुळे शहरातील 42 कोटींची विकासकामे आता होणार आहे. यासंदर्भात अधिक माहिती घेण्यासाठी सार्वजनिक बांधकाम विभागाचे कार्यकारी अभियंता प्रशांत सोनवणे यांची बुधवार दि.21 रोजी भेट घेणार असल्याचे महापौर भारती सोनवणे यांनी सांगितले.
42 कोटींच्या निविदेला ग्रीन सीग्नल
शहराच्या विकासकामांसाठी मिळालेल्या 100 कोटींच्या निधीतून सार्वजनिक बांधकाम विभागाने निविदा प्रक्रिया सुरु केली आहे. 100 कोटींतून 42 कोटींच्या कामांची निविदा काढून 30 डिसेंबरपर्यंत निविदा मागविण्यात आल्या होत्या .मात्र शासनाने विकास कामांकरीता दिलेल्या निधीतून करावयाच्या कामांना स्थगिती दिली होती. दरम्यान,स्थगिती उठविण्यात आल्याने मार्ग मोकळा झाला आहे.
