मुंबई – महाराष्ट्र नवनिर्माण सेनेचे अध्यक्ष राज ठाकरे यांचे पुत्र अमित ठाकरे राज्याच्या राजकारणात पूर्णपणे सक्रिय होणार असल्याची माहिती समोर आली आहे. दिवंगत शिवसेनाप्रमुख बाळासाहेब ठाकरे यांच्या जयंती दिनी २३ जानेवारीला मुंबईत मनसेचं पहिलं महाअधिवेशन होणार आहे. या अधिवेशनात अमित ठाकरे यांच्या राजकारणातील सक्रिय वाटचालीची घोषणा होणार असल्याची माहिती सुत्रांनी दिली आहे.
गेल्या काही दिवसांपासून ‘मनसे’च्या या अधिवेशनाच्या निमित्ताने विविध राजकीय चर्चांना उधाण आलं आहे. राज ठाकरे आता राजकीय भूमिका बदलण्याचा तयारीत असल्याचं सांगण्यात येत आहे. त्यात मुंबईत राज आणि फडणवीस यांच्या गुप्त बैठकीने अनेकांच्या भुवया उंचावल्या आहेत. भविष्यात मनसे आणि भाजप असं समीकरण राज्याच्या राजाकारणात पाहायला मिळणार असल्याची चर्चा सुरू झाली आहे. त्यात ‘राज’पुत्राच्या राजकारणातील एण्ट्रीनं पक्षाला नवचैतन्य आणि युवा नेतृत्त्व देण्याचा मनसेचा प्रयत्न असल्याचं बोललं जात आहे.
