अयोध्या -: संपूर्ण देशाचे लक्ष लागून असलेल्या सोहळ्याचे अयोध्येत आजपासून प्राणप्रतिष्ठा पर्वास प्रारंभ होतं असून पुढील ६ दिवस पूजा-अर्चा होणार आहे. भव्य नवीन मंदिराच्या गर्भगृहात विराजमान करण्यासाठी म्हैसूरचे शिल्पकार अरुण योगिराज यांनी साकार केलेल्या रामलल्लाच्या मूर्तीची निवड झाली आहे.श्रीराम मंदिरात रामलल्लांची प्राणप्रतिष्ठा २२ जानेवारीला होणार आहे दरम्यान त्याच्या आधीच्या विधींना आज १६ जानेवारीपासून प्रारंभ होतं आहे.
प्रायश्चित्त पूजेने प्रारंभ….
संपूर्ण प्राणप्रतिष्ठा सोहळ्यात छोटीशीदेखील चूक झाली तर तिचे कोणतेही परिणाम होऊ नयेत, यासाठीच्या प्रायश्चित्त पूजेने विधीला सुरुवात करण्यात येणार आहे.
सध्या तात्पुरत्या मंदिरात विराजमान रामलल्ला व अन्य मूर्तींना मिरवणुकीने आणि मंत्रोच्चारात १७ जानेवारीला नवीन मंदिर परिसरात आणले जाईल. पवित्र नद्यांच्या जलाचा मूर्तीना अभिषेक, अष्टगंध, केशर, विविध प्रकारची अत्तरे, दूध, पंचगव्याचा अभिषेक केला जाईल. शर्कराधिवास या विधीमध्ये मूर्तीना साखरेत ठेवले जाते आणि साखरयुक्त जलाने अभिषेक केला जातो. फलाधिवासामध्ये मूर्ती फळांमध्ये ठेवणे, त्यासाठीची पूजा केली जाते. श्रीराम जन्मभूमी तीर्थक्षेत्र या ट्रस्टचे महासचिव चंपत राय यांनी संपूर्ण सोहळ्याची माहिती दिली.
असे आहे वेळापत्रक
१६ जानेवारी: प्रायश्चित्त आणि कर्मकुटी पूजन
१७ जानेवारी : रामलल्ला मूर्तीचा मंदिरपरिसरात प्रवेश
१८ जानेवारी (सायंकाळी) : तीर्थपूजन आणि जलयात्रा, जलाधिवास आणि गंधाधिवास
१९ जानेवारी (सकाळी) : औषधाधिवास, केसराधिवास, घृताधिवास. सायंकाळी : धान्याधिवास
२० जानेवारी (सकाळी) : शर्कराधिवास, फलाधिवास. सायंकाळी पुष्पाधिवास २१ जानेवारी (सकाळी) : मध्याधिवास.सायंकाळी – शय्याधिवास
२२ जानेवारी : प्राणप्रतिष्ठा सोहळा
पूजाविधीचे संयोजक : गणेश्वर शास्त्री द्रविड
प्रमुख आचार्य : लक्ष्मीकांत दीक्षित (काशी)
