नवी दिल्लीः- नागरिकत्व कायद्यावरून आज राजधानी दिल्लीत हिंसक आंदोलन करण्यात आले. आंदोलनकर्त्यांनी दक्षिण दिल्लीच्या के न्यू फ्रेंड्स कॉलनीत जाळपोळ केली. ३ बसेस व काही मोटरसायकल आगीत जळून खाक झाल्या. आग विझवण्यासाठी तात्काळ अग्निशमन दलाच्या ४ गाड्या घटनास्थळी पोहोचल्या परंतु, आंदोलनकर्यांच्या तावडीतून या गाड्याही सुटल्या नाही. त्यांनी या गाड्यांना आग लावली. यात अग्निनशमन दलाचे दोन जवान जखमी झाले आहेत. त्यामुळे दक्षिण दिल्लीच्या चार मेट्रो स्टेशनवर जाणाऱ्या रस्त्यांवरचा प्रवेश बंद करण्याचा निर्णय मेट्रोने घेतला आहे.
नागरिकत्व विधेयकावरून देशभरात सुरू असलेले आंदोलन दिल्लीत धडकले. आज सकाळपासूनच आंदोलनकर्त्यांनी रस्त्यावर उतरून हिंसक आंदोलन केले. जामियानगर ते ओखलाकडे मोर्चा निघाला. या आंदोलनात जामिया मिलिया इस्लामिया विद्यापीठातील विद्यार्थ्यांचा समावेश होता, असे सांगण्यात येत आहे. या मोर्चावेळी पोलीस आणि आंदोलनकर्त्यांत राडा झाल्याने हिंसक आंदोलन पेटले. पोलिसांनी आंदोलनकर्त्यांना पांगवण्यासाठी अश्रूधुराच्या नळकांड्या फोडल्या. तसेच आंदोलनकर्त्यांवर लाठीमार केला. पोलिसांच्या लाठीमारामुळे आंदोलन आणखी चिघळले. आंदोलनकर्त्यांनी बसेसवर दगडफेक केली. आंदोलनकर्त्यांनी हातात तिरंगा तसेच प्लेकार्ड घेऊन नागरिकत्व कायद्याविरोधात घोषणाबाजी केली. त्यामुळे रस्त्यावर वाहतूक कोंडी झाली.
मथुरा रोडवर आंदोलनकर्ते शांततेत बसून आंदोलन करीत होते. त्याचवेळी पोलिस त्या ठिकाणी आले व त्यांनी आंदोलनकर्त्यांसोबत हुज्जत घातली. आंदोलनकर्त्यांनी विरोध करताच पोलिसांनी लाठीमार सुरू केला, असा आरोप काँग्रेस विद्यार्थी संघटना एनएसयूआयचे राष्ट्रीय सचिव सॅमन फारूखी यांनी पीटीआयशी बोलताना केला. यानंतर आंदोलनकर्त्यांनी तीव्र आंदोलन केले. हिंसक आंदोलनाचा फटका मेट्रो स्टेशनला बसला आहे. दिल्ली मेट्रोने ट्विट केले. दिल्ली पोलिसांच्या सल्ल्यानंतर मेट्रोने जामिया मिलिया इस्लामिया, ओखला विहार आणि जसोला विहाल शाहीन बाग मेट्रो स्टेशनवरील प्रवेश व बाहेर जाणारा रस्ता बंद केला आहे. या स्टेशनवर आता कोणतीही मेट्रो थांबणार नाही. तसेच आश्रम मेट्रो स्टेशनचे गेट नंबर ३ सुद्धा बंद करण्यात आले आहे. नागरिकत्व विधेयक मंजूर करण्यात आल्यानंतर आसाम, पश्चिम बंगाल व दिल्लीत तीव्र आंदोलन सुरू आहेत. आसाम व पश्चिम बंगालमधील काही भागात इंटरनेट सेवा बंद करण्यात आली आहे.
