लखनऊः- बहुजन समाज पार्टीच्या (बसपा) राष्ट्रीय अध्यक्षा मायावती यांनी सावरकरांच्या मुद्द्यावरून काँग्रेसवर शरसंधान साधले आहे. महाराष्ट्रात शिवसेना-काँग्रेस सत्तेत सहभागी आहेत. शिवसेना आपल्या मूळ अजेंड्यावर कायम आहे. शिवसेनेने नागरिकत्व संशोधन विधेयकावेळी केंद्र सरकारला मदत केली. सावरकरांविषयी काँग्रेसने मांडलेली भूमिका शिवसेनेला मान्य नाही. तरीही महाराष्ट्रात काँग्रेस शिवसेनेसोबत सत्तेत सहभागी आहे, यावरून काँग्रेसची दुटप्पी भूमिका स्पष्ट होत असल्याचे मायावती यांनी म्हटले आहे.
मायावती यांनी ट्विट केले असून काँग्रेसवर जोरदार टीका केली आहे. शिवसेनेने आपला मूळ अजेंडा कायम ठेवला आहे. म्हणून त्यांनी नागरिकत्व संशोधन विधेयकावेळी केंद्र सरकारला साथ दिली. आता सावरकरांच्या मुद्द्यावरूनही शिवसेनेला काँग्रेसची भूमिका मान्य नाही. शिवसेनेने अशी भूमिका घेतलेली असताना राज्यात काँग्रेस शिवसेनेसोबत सत्तेत सहभागी आहे, हा सर्व प्रकार म्हणजे काँग्रेसची दुटप्पी भूमिका आहे, असे मायावती यांनी आपल्या ट्विटमध्ये म्हटले आहे. काँग्रेसने याविषयी आपली भूमिका स्पष्ट करणे गरजेचे आहे, असेही मायावती यांनी म्हटले आहे. जर काँग्रेसने आपली भूमिका स्पष्ट केली नाही तर काँग्रेसचे सध्या सुरू असलेले राजकारण हे सर्व जनतेच्या डोळ्यात धुळफेक करण्यासाठी आहे. तसेच काँग्रेस केवळ नाटक करतेय हे स्पष्ट होईल, असे मायावती यांनी म्हटले आहे.
