नागपूर । नागपूर शहरातून एक धक्कादायक घटना समोर आली आहे. नागपुरातील भाजपच्या महिला कार्यकर्त्या सना खान १ ऑगस्टपासून बेपत्ता असल्याचं समोर आलं आहे. याप्रकरणी मानकापूर पोलिसांनी त्या बेपत्ता असल्याची नोंद केली आहे. पोलिसांची दोन पथके जबलपूरला रवाना झाली असून, अद्याप त्यांच्याबाबत कोणतीही माहिती पोलिसांना मिळालेली नाही. त्यांचा घातपात झाल्याचा संशय व्यक्त होत असल्याने पोलिसांमध्ये खळबळ उडाली आहे.
सना खान या भाजपच्या अल्पसंख्याक सेलचे पदाधिकारी आहे. जबलपूरचा गुन्हेगार अमित उर्फ पप्पू साहू याला त्यांच्या बेपत्ता होण्यासाठी जबाबदार धरले जात असले तरी पप्पूही बेपत्ता आहे. 1 ऑगस्टच्या रात्री सना खान पप्पूला भेटण्यासाठी जबलपूरला गेली होती. २ ऑगस्टला सकाळी आईशी बोलून जबलपूरला पोहोचल्याची माहिती दिली, मात्र संध्याकाळी आईने फोन केला असता फोन बंद असल्याचे आढळले.
सनाशी कोणत्याही प्रकारे संपर्क न झाल्याने घरातील सदस्य काळजीत पडले. पप्पूलाही बोलावले होते. त्याने सांगितले की, सना वादानंतर परतली. मुलीबाबत काहीही न मिळाल्याने आईने मानकापूर पोलिसांत बेपत्ता झाल्याची तक्रार केली. अनुचित प्रकाराच्या भीतीने पोलिसांचे पथक जबलपूरला रवाना झाले.जबलपूर पोलिसांच्या मदतीने नागपूर पोलिस त्यांचा शोध घेत आहेत.
दरम्यान, घातापात झाल्याची चर्चा सोमवारी नागपुरात पसरली. वरिष्ठ पोलिस अधिकाऱ्यांची या प्रकरणाबाबत सायंकाळी दोन तास पोलिस आयुक्तालयात बैठक झाली. बैठकीत तपासाची दिशा ठरविण्यात आली. या प्रकरणाची सखोल चौकशी केल्यास अनेक खुलासे होण्याची शक्यता वर्तविण्यात येत आहे. खान या बेपत्ता असल्याची तक्रार नोंदविण्यात आली असून प्रकरणाची चौकशी सुरू आहे, अशी माहिती मानकापूर पोलिसांनी दिली.
