जळगाव,(प्रतिनिधी)- जळगाव शहरातील कालिंका माता मंदिर परिसरातील स्टेट बँकेच्या शाखेमध्ये दोन जणांनी भरदिवसा जबरी चोरी केली. चोरट्यांनी चाकूचा धाक दाखवून बँकेतील कर्मचाऱ्यांना बंधक बनवत बँकेतून सुमारे साडेतीन कोटींचे सोने व १७ लाख रुपयांची रोकडवर डल्ला मारला. सिनेस्टाईल चोरांनी भरदिवसा बँकेवर दरोडा टाकल्याने शहरात खळबळ उडाली ही थरारक घटना गुरुवारी सकाळी ९.३० ते १०.३० या वेळेत घडली.
सकाळी ९.३० वाजता हेल्मेट घातलेल्या दोन चोरट्यांनी स्टेट बँकेमध्ये प्रवेश केला. सफाई कर्मचारी व सुरक्षारक्षकाला मारहाण करून त्यांना चाकूच्या जोरावर बंधक बनविले. नंतर बँक व्यवस्थापकालादेखील मारहाण केली. कॅशरूम उघडल्यावर व्यवस्थापक आणि एका चोरट्यामध्ये झटापट झाली. त्यात चोरट्याने व्यवस्थापकाच्या पायावर चाकुने वार करून गंभीर जखमी केले. नंतर साडेतीन कोटींचे सोने व १७ लाख रुपयांची रोख रक्कम घेऊन चोरटे पसार झाले.चोरट्यांच्या हल्ल्यात व्यवस्थापक राहुल महाजन जखमी झाले आहे.
दरोडेखोरांनी डीव्हीआर नेला सोबत…
चोरट्यांनी सीसीटीव्ही कॅमेऱ्यात डीव्हीआरसुद्धा सोबत नेला आहे. घटनेची माहिती मिळाल्यावर पोलिसांनी घटनास्थळी धाव घेतली होती. त्यानंतर तपासाला वेग देत रस्त्यांवरील सीसीटीव्ही फुटेजदेखील पोलिसांकडून तपासले जात आहेत.
