जळगाव : जळगाव शहरातील गोलाणी मार्केटमध्ये रात्री सोपान गोविंदा हटकर (वय २५, रा. हरी विठ्ठल नगर, जळगाव) या तरुणाची चॉपरने हल्ला करत त्याची हत्या करण्यात आली आहे. या हत्येनंतर अवघ्या काही तासात जळगाव एलसीबीच्या पथकाने गुन्हा उघडकीस आणला. बाईक देण्याच्या वादातून तरुणाला मार्केटमध्ये बोलावलं आणि त्याची हत्या केल्याचं पोलिसांच्या तपासात समोर आले आहे. या प्रकरणी शहर पोलीस ठाण्यात चार जणांविरोधात गुन्हा दाखल करण्यात आला आहे.
शहरातील हरी विठ्ठल नगरात सोपान हटकर हा आईसोबत राहत असून तो सेंटरींग तसेच मिळेल ते मजुरी काम करुन तो उदरनिर्वाह चालवत होता. दरम्यान, सोपानने काही दिवसांपूर्वी फायनान्सवर हप्त्याने बाईक घेतली होती. बाईक काही हप्ते थकल्याने कंपनीवाले ही दुचाकी ओढून घेऊन जातील या भितीने सोपानने त्याची दुचाकी त्याच्या जळगाव तालुक्यातील रिंगणगाव येथील रहिवासी मामा सुपडू अर्जून पाटील यांच्या शेतातील खळ्यात लपवून ठेवली होती.
मात्र, सोपानने लपवलेली बाईक त्याचे मित्र गोविंदा शांतीलाल झांबरे आणि ज्ञानेश्वर दयाराम लोंढे ऊर्फ नानू हे परस्पर घेऊन तिचा वापर करत होते. याबाबत त्याने रागावले देखील होते. त्यानंतर २६ मार्च रोजी दुपारी गोविंदा झांबरे आणि ज्ञानेश्वर हे दोघंही सोपानची बाईक घेऊन पारोळा येथे लग्नाला गेले होते. सोपानला याबाबत समजताच त्याने फोन करुन दोघांना जळगावला बोलावले होते.
त्यानुसार दोघांनी सोपानला रात्री गोलाणी मार्केट येथे बाईक घेण्यासाठी बोलावले होते. त्यानुसार सोपान त्याची बाईक घेण्यासाठी रात्री साडेनऊ वाजेच्या सुमारास गोलाणी मार्केट येथे गेला. याठिकाणी दुचाकी घेण्यावरुन त्याचा गोंविदा आणि ज्ञानेश्वर यांच्याशी वाद झाला. या वादातून दोघांनी आणि त्यांच्यासोबत असलेल्या राहूल भरत भट आणि करण सुभाष सकट या चार जणांनी सोपानवर चॉपरने सपासप वार करत त्याची हत्या केली.
या प्रकरणी मयत सोपानची आई सरलाबाई गोविंदा हटकर (वय ४७) यांच्या फिर्यादीवरुन गोविंदा शांतीलाल झांबरे (रा. नाथवाडा), ज्ञानेश्वर दयाराम लोंढे ऊर्फ नानू (रा. कंजरवाडा) राहूल भरत भट (रा. खोटेनगर) आणि करण सुभाष सकट (रा. बी.जे.मार्केट कोंडवाडा, जळगाव) या चार जणांविरोधात हत्येचा गुन्हा दाखल करण्यात आला आहे.
