जळगाव । शेतजमीन गटाच्या पोट हिस्सा मोजणीसाठी २० हजार रुपयाची लाच घेताना शिंदखेडा येथील भूमीलेख कार्यालयातील छाननी लिपीकास चांगलीच महागात पडली. जळगावच्या लाचलुपत विभागाच्या पथकाने लाच घेताना रंगेहात अटक केली. सुशांत अहिरे असे लाचखोराचे नाव असून या कारवाईने परिसरात मोठी खळबळ उडाली आहे. दरम्यान, याबाबत याप्रकरणी धुळे शहर पोलीस ठाण्यात गुन्हा दाखल करण्यात आला आहे.
तक्रारदार हा जळगाव संभाजीनगर परिसरातील रहिवासी असून त्यांनी बेटावद गावातील शेतजमीन गटाच्या पोट हिस्सा मोजणीसाठी अती तातडीचे चलन भरुन अर्ज सादर केला होता. या कामासाठी छाननी लिपीक सुशांत अहिरे याने तक्रारदाराकडून ११ नोव्हेंबर २०२२ रोजी चाळीस हजार रुपयांची लाच मागीतली होती. त्याच दिवशी २० हजार रुपयांची आगावू रक्कम स्विकारली होती. उर्वरीत २० हजाराची रक्कम स्विकारतांना त्यास आज रंगेहाथ पकडले.
एसीबीचे पोलिस उप अधीक्षक शशिकांत पाटील यांच्या मार्गदर्शनाखाली सापळा अधिकारी पोलिस निरीक्षक एन.एन. जाधव तसेच पो.नि.संजोग बच्छाव, सहायक फौजदार दिनेशसिंग पाटील, सुरेश पाटील, हे.कॉ.अशोक अहिरे, पो.ना. ईश्वर धनगर, बाळू मराठे, पो.ना. महाजन, पोकॉ.अमोल सूर्यवंशी, पो.कॉ. प्रणेश ठाकूर यांनी परिश्रम घेतले.
