पुणे | राज्यात महिलांवर होणारे अत्याचार थांबता थांबत नाहीय. अशातच पुण्यातील वारजे माळवाडीमध्ये घरी आयोजित केलेल्या एका पार्टीदरम्यान २० वर्षीय तरुणीवर बलात्कार झाल्याची धक्कादायक घटना उघडकीस आली आहे. या घटनेमुळे वारजे परिसरामध्ये एकच खळबळ उडाली आहे. मूळचा दौंड येथील राहिवाशी असलेल्या स्वप्निलला ठाणगे या २४ वर्षीय आरोपीला पोलिसांनी अटक केली आहे.
पोलिसांनी दिलेल्या माहितीनुसार, अभियांत्रिकी अभ्यासक्रमाचं शिक्षण घेणाऱ्या सात ते आठ मित्र-मैत्रिणींनी कर्वेनगर येथे राहणार्‍या एका मित्राच्या घरी पार्टीच आयोजन केलं होत. या पार्टीचं आयोजन करण्यात आलं त्यावेळी २० वर्षीय पीडित तरुणीने मद्यपान केल्यानंतर तिला अस्वस्थ वाटू लागले. मोकळ्या हवेत उभं रहावं असा विचार करुन ही तरुणी घराच्या गॅलरीमध्ये गेली. या तरुणीपाठोपाठ आरोपी स्वप्निल देखील गॅलरीमध्ये गेला. त्याने देखील मद्यपान केलं होतं. नशेच्या धुंदीत असलेल्या स्वप्निलने गॅलरीमध्ये पहाटेच्या सुमारास या तरुणीवर बलात्कार केला.
या घटनेबाबत पीडित तरुणींने मैत्रिणीला सर्व घटनाक्रम सांगितल्यानंतर पीडित तरुणीने मैत्रिणीच्या मदतीने पोलीस स्थानकामध्ये धाव घेतली. या तरुणीने पोलिसात तक्रार देताच आरोपी स्वप्निल ठाणगे विरोधात बलात्काराचा गुन्हा दाखल करून त्याला अटक केली आहे. या प्रकरणामध्ये अधिक तपास करण्यात येत असल्याचे वारजे माळवाडी पोलिसांनी सांगितले.
