मुंबई – शिवसेनाप्रमुख बाळासाहेब ठाकरे यांच्या जीवनावर आधारित असलेला बहुचर्चित ‘ठाकरे’ चित्रपट प्रदर्शित झाल्यापासून बॉक्स ऑफिसवर या चित्रपटाने वर्चस्व प्रस्थापित केलं. या चित्रपटाचा दुसरा भाग लवकरच प्रदर्शित होणार आहे. ठाकरे २ चे काम सुरू झाल्याचा खुलासा अभिनेता नवाजुद्दीन सिद्धिकीने केला आहे.
ठाकरे २’ च्या स्क्रिप्टवर काम सुरू झालं आहे, स्क्रिप्ट लिहून पूर्ण झाल्यावर आम्ही चित्रीकरणाला सुरुवात करणार आहोत. पहिल्या भागात ठाकरेंची भूमिका मी साकारली असल्याने दुसऱ्या भागातही मीच त्या भूमिकेत दिसणार आहे. स्क्रिप्टचं काम पूर्ण झाल्यावर संजय राऊत मला सांगणार आहेत, त्यांचा निरोप आल्यानंतर चित्रीकरणाला सुरुवात होईल. चित्रपटात बाळासाहेबांची भूमिका साकारणं मला नेहमीच आव्हानात्मक वाटतं पण ही भूमिका साकारायला तितकाच आनंदही वाटतो. ‘ असं नवाजुद्दीन सिद्धिकी म्हणाला.
दिग्दर्शकांसोबत काम करण्याबाबत बोलताना नवाज म्हणाला की, ‘मला नव्या दिग्दर्शकांसोबत काम करायला अधिक मजा येते. कारण नव्या दिग्दर्शकांच्या डोक्यात ताज्या कल्पना असतात, वेगळं काहीतरी करण्याची तळमळ असते. ते सतत वेगवेगळे प्रयोग करत राहतात आणि या प्रयोगात सहभागी व्हायला मला आवडतं.’
चित्रपटसृष्टीतील बरेच अभिनेते दिग्दर्शनाकडे वळत असताना नवाजला मात्र त्यात रस नाही. ‘मला दिग्दर्शनातील काहीच समजत नाही त्यामुळे दिग्दर्शन वगैरे करण्याचा मी कधीच विचार केला नाही. कॅमेरा कसा हाताळायचा याची साधी कल्पनाही मला नाही. मला केवळ अभिनय कळतो, समजतो आणि करता येतो. त्यामुळे मी तेच करत राहीन. जेव्हा मी चित्रीकरण करत नसतो त्यावेळीदेखील मी मित्रांशी अभिनयाविषयीच गप्पा मारतो. मी गेली २०-२५ वर्ष हेच करतोय’ असंही नवाज म्हणाला.
