पुणे : महाराष्ट्रात महिलांवरील अत्याचाराच्या घटना कमी होण्याचे नाव घेत नाहीय. दिवसेंदिवस हे प्रकार वाढतच असल्याचे दिसून आले. अशातच एक धक्कादायक घटना समोर आलीय. तरुणीचा पाठलाग करत चार जणांनी पकडून तिच्या तोंडात मिरची पावडर कोंबली व डोळ्यात मिरची पावडर टाकली. तसेच तिच्या सर्व कपड्यांवर आणि गुप्तांगावर दारू ओतून तिच्या हातावर ब्लेडने वार केल्याचा धक्कादायक प्रकार गुरुवारी (२२ सप्टेंबर) दुपारी १२ वाजण्याच्या सुमारास निगडी येथील गंगानगर येथे घडला. याप्रकरणी पोलिसांनी एका आरोपीला अटक केली आहे.
पीडित तरुणीच्या ३२ वर्षीय बहिणीने गुरुवारी निगडी पोलिस ठाण्यात फिर्याद दिली आहे. त्यानुसार, चेतन मारुती घाडगे (३१, रा. गुरुद्वारा रोड, औंध गाव, पुणे) याच्यासह तीन अनोळखींविरोधात गुन्हा दाखल करण्यात आला आहे. पोलिसांनी आरोपी चेतन घाडगेला अटक केली. पोलिसांनी दिलेल्या माहितीनुसार, पीडित २७ वर्षीय तरुणी गुरुवारी गुरुदेवनगर येथील बेल्हेश्वर मंदिरातून दर्शन घेऊन परत येत होती. रस्त्यावर असणाऱ्या कणीस विक्रेत्याकडून पीडित तरुणी कणीस घेत होती. त्याचवेळी आरोपी चेतन घाडगे आणि तीन साथीदार तेथे आले. तरुणीला पाहून ‘काढ रे काढ कोयता, हिच्यावर वार कर,’ असा दम त्यांनी भरला. त्यामुळे घाबरलेल्या तरुणीने तेथून पळ काढला.
हे पण वाचा :
करोडो शेतकऱ्यांसाठी खुशखबर.. 12 व्या हप्त्याचे 2000 या तारखेला येणार
केदारनाथ येथे हिमस्खलनाचे भीषण दृश्य समोर ; पहा हा VIDEO
वर्धा येथील बँक ऑफ इंडियामध्ये 8वी ते ग्रॅज्युएट पाससाठी नोकरीची संधी..
तरुणी रस्त्याने पळत असताना आरोपींनीदेखील तिचा पाठलाग सुरु केला. त्यामुळे तरुणी गुरुदेवनगर येथील एका सार्वजनीक शौचालयात जाऊन लपली. आरोपीही तिच्या मागे पळत पळत जाऊन शौचालयात घुसले. त्यांनी तरुणीला पकडत तिच्या अंगावर आणि गुप्तांगावर दारू ओतली. तिला मिरची पावडर खाऊ घातली व डोळ्यातही टाकली. त्यानंतर तिच्या हातावर ब्लेडने वार करत जखमी केले. तिच सर्व कपडे फाडून आरोपी तेथून फरार झाले. पोलिस उपनिरीक्षक उत्तम ओमासे पुढील तपास करत आहेत.
