लखनौ : पोलीस व होमगार्डमध्ये तुंबळ हाणामारी झाल्याचा व्हिडीओ सोशल मीडियावर तुफान व्हायरल झाला आहे. पैशांची बरोबर वाटणी न झाल्याच्या मुद्द्यावरून पोलीस आणि होमगार्डने परस्परांना लाथाबुक्क्यांनी हाणामारी केली. हाणामारीची ही घटना उत्तर प्रदेशच्या जालौनमध्ये घडल्याचे समोर आले आहे.
मारहाणीचा व्हिडिओ व्हायरल झाल्यानंतर पोलीस विभागात खळबळ उडाली असून, त्याची दखल घेत पोलीस अधीक्षकांनी मारहाण करणाऱ्या कॉन्स्टेबलला तत्काळ निलंबित केले. यासोबतच त्यांची विभागीय चौकशीही सुरू करण्यात आली आहे. त्याच होमगार्डचा अहवालही कमांडंटला देण्यात आला.
नागरिकांच्या मदतीसाठी राखीव हेल्पलाईन नंबर असलेल्या डायल 100 वर तैनात असलेले हवालदार धरमवीर सिंह आणि होमगार्ड सुनील कुमार एकमेकांशी भिडले. दोघांनी एकमेकांवर लाथा-बुक्क्या मारण्यास सुरुवात केली.
https://twitter.com/HindustanUPBH/status/1566757135383334913
शनिवारी सायंकाळी 6 वाजण्याच्या सुमारास दोघेही दारुच्या नशेत गाडीतून ड्युटीवर जात होते. यादरम्यान पैसे वाटण्यावरून दोघांमध्ये वाद झाला. त्यांच्यामध्ये पैसे वाटपाबाबत मतभेद होते.
कमी पैसे मिळाले म्हणून जोरदार हाणामारी
मला कमी पैसे मिळाले, असा त्या दोघांचा दावा होता. त्यातूनच पुढे दोघांमध्ये जोरदार हाणामारी झाली. गाडीत उपस्थित असलेल्या इतर पोलिसांनी मध्यस्थी केले आणि दोघांना वेगळे केले. मात्र झालेल्या हाणामारीचा व्हिडिओ शेजारून चाललेल्या नागरिकांनी बनवला आणि दोन्ही सुरक्षा जवानांची नशाच उडवली.
