नवी दिल्ली : एकीकडे देशातील अनेक ठिकाणी उन्हाचा पारा वाढला आहे. तर अशातच आता देशातील काही राज्यांना अवकाळी पावसाचा इशारा देण्यात आला आहे. आसाम, मेघालय, मणिपूर, मिझोरामसह पश्चिम बंगालच्या काही भागात गडगडाटी वादळाचा अंदाज हवामान खात्याने वर्तवला आहे. यासोबतच सिक्कीम, जम्मू-काश्मीर आणि उत्तराखंडमध्ये येत्या तीन दिवसांत जोरदार वाऱ्यासह पावसाची शक्यता वर्तवण्यात आली आहे.
दरम्यान, आज महाराष्ट्रातील विदर्भ वगळता उर्वरित महाराष्ट्रामध्ये आज आणि उद्या हलक्या ते मध्यम स्वरुपाचा पाऊस पडण्याची शक्यता असल्याचे हवामान खात्याने म्हटले आहे. तर दुसरीकडे विदर्भात उष्णतेची लाट कायम आहे.
आयएमडीने सल्लागार जारी केला
आयएमडीने हवामानाच्या पार्श्वभूमीवर लोकांना सतर्क राहण्यास सांगितले आहे कारण या काळात अनेक भागात वीज पडण्याच्या घटना घडू शकतात. यासह सोसाट्याच्या वाऱ्यामुळे पिकांचे नुकसान होण्याची भीती आहे. विजेमुळे जीवित व मालमत्तेचे आणि प्राण्यांचे नुकसान होऊ शकते.
दिल्ली-हरियाणामध्ये पावसाचा अंदाज
पुढील 5 दिवस जम्मू-काश्मीर, लडाख, मुझफ्फराबाद आणि हिमाचल प्रदेशमध्ये हलक्या पावसाचा अंदाज वर्तवण्यात आला आहे. याशिवाय 20 आणि 22 एप्रिल रोजी उत्तराखंडमध्ये पावसाची शक्यता आहे. त्याच वेळी, 19 ते 22 एप्रिल दरम्यान पंजाब, हरियाणा आणि दिल्लीमध्ये हलका पाऊस पडू शकतो.
बिहार, झारखंड, बंगाल आणि ओडिशाच्या काही भागांमध्ये पुढील 5 दिवस काही ठिकाणी गडगडाटी वादळे आणि गडगडाटासह पाऊस पडू शकतो. याशिवाय तामिळनाडू, पुद्दुचेरी आणि केरळच्या काही भागात मुसळधार पावसाची शक्यता आहे.
