मुंबई : मुंबईतील एका बारमध्ये गैरप्रकार सुरू असल्याची माहिती मिळाल्यानंतर मुंबई पोलिसांच्या समाजसेवा शाखेच्या पथकाने छापेमारी केली. येथून २७ जणांना अटक केली असून, १२ महिलांची सुटका केली आहे.
मिळालेल्या माहितीनुसार, बारमध्ये अश्लील नृत्य आणि गैरकृत्ये सुरू असल्याची माहिती समाजसेवा शाखेच्या पथकाला मिळाली होती. याबाबत खात्री पटल्यानंतर पथकाने छापेमारी केली. बारमध्ये केवळ ओळखीतील लोकांनाच प्रवेश दिला जात होता, अशीही माहिती मिळाली होती. या छापेमारीत बारमधून २७ जणांना अटक केली. तर १२ महिलांची सुटका केली. या प्रकरणी एमआयडीसी पोलीस ठाण्यात गुन्हा दाखल करण्यात आला आहे, असे अधिकाऱ्यांनी सांगितले.
मागील आठवड्याच्या सुरुवातीला मुंबईच्या मालाड परिसरात एका बारमध्ये छापा मारला होता. त्यावेळी जवळपास ३० जणांना अटक केली होती. तर २५ महिलांची सुटका करण्यात आली होती. शहर गुन्हे शाखेच्या समाजसेवा शाखेने ही कारवाई केली होती.
