उत्तर प्रदेश : देशातील नुकत्याच पार पडलेल्या पाच राज्यांमधील निवडणुकीचा निकाल आज जाहीर होणार आहे. उत्तर प्रदेशच्या निकालाकडे आज सर्वांच्या नजरा लागून आहे. दरम्यान उत्तर प्रदेशातून पहिला कल समोर आला असून उत्तर प्रदेशात भाजप 72 जागांवर आघाडीवर आहे.
तर समाजवादी पार्टीवर 44 जागांवर आघाडीवर आहे. भाजप आणि समाजवादी पार्टी यांच्यात काटे की टक्कर दिसून येत आहे. 403 पैकी 120 जागांचा कल समोर आला आहे. त्यात 72 जागांवर भाजप पुढे आहे. तर अखिलेश यादव यांची सपा 45 जागांनी पिछाडीवर आहे.
भाजपला गेल्या निवडणुकीत प्रथमच उत्तर प्रदेशात खणखणीत यश मिळालं. योगी आदित्यनाथ सरकार गेल्या वेळच्या 312 पैकी किती जागा टिकवणार याचे अंदाज वेगवेगळ्या एक्झिट पोल्सनी वर्तवले आहेत. बहुतेकांनी भाजपच्या पदरात बहुमत टाकलं आहे. एक्झिट पोलच्या आकडेवारीनुसार काँग्रेसच्या सरचिटणीस प्रियंका गांधी या युपीच्या निवडणुकीत पुन्हा एकदा सपशेल फेल ठरताना दिसल्या. प्रत्यक्ष निकालात ते किती खरं ठरणार हे कळेल. मायावतींचा बहुजन समाज पक्ष कुठपर्यंत मजल मारेल हेही स्पष्ट होईल.
403 पैकी 325 जागा मिळवून भाजपने मित्र पत्राबरोबर गेल्या निवडणुकीत एक मजबूत सरकार दिलं होतं. एकट्या भाजपनेच 312 जागा खिशात घातल्या होत्या. त्या वेळी उत्तर प्रदेशात मोदींची लाट होती, असं म्हटलं जातं.
