मुंबई : शिवसेना खासदार संजय राऊत यांनी आज शिवसेना भवन येथे पत्रकार परिषद घेत भाजप आणि केंद्रीय तपास यंत्रणांवर निशाणा साधला. “ईडी भाजपचं एटीएम मशीन म्हणत भाजप नेते किरीट सोमय्या ईडीचे वसुली एजंट आहेत. तसेच जितेंद्र नवलानी या व्यक्तीच्या माध्यमातून ईडी भ्रष्टाचाराचं रॅकेट चालवतं, असा सनसनाटी आरोप संजय राऊत यांनी केलाय.
शिवसेना भवनात बरोबर ४ वाजून १० मिनिटांनी संजय राऊत यांनी पत्रकार परिषदेला आरंभ केला. १५ फेब्रुवारी नंतर राऊतांनी आज दुसऱ्या पत्रकार परिषदेचं आयोजन केलं होतं. आज कोणत्या नेत्यांवर राऊतांची तोफ धडाडणार, याची उत्सुकता होती. किरीट सोमय्या यांच्या नावाशिवाय भाजपच्या कोणत्याही नेत्याचं नाव त्यांनी घेतलं नसलं तरी लवकरच भाजपच्या भ्रष्टाचारी नेत्यांचं पितळ उघडं पाडणार असल्याचा इशारा यावेळी राऊतांनी दिला.
“अंमलबजावणी संचलनालय अर्थात ईडीने दिवाण हाऊन्सिंग फायन्सासची २०१७ साली चौकशी सुरु केली. ज्यानंतर जितेंद्र नवलानी खात्यावर 25 कोटी ट्रान्सफर झाले. मग 31 मार्च 2022 नंतर वाधवानच्या कंपनीकडून नवलानीच्या कंपनीला पैसे गेले. नंतर ईडीने अरविंद भोसलेंची चौकशी केली. मग भोसलेंकडून नवलानीला पैसे ट्रान्सफर झाले. अर्थात ईडीच्या कोणत्या अधिकाऱ्याच्या अकाऊंटमध्ये कुठे-कसे पैसे गेलेत, हे मी हळूहळू सांगेन. नवलानी हा व्यक्ती कोण आहे? किरीट सौमय्या आणि नवलानीचा काय संबंध आहे”, असे सवाल राऊतांनी उपस्थित केले.
