चाळीसगाव : राज्यात वाढत्या कोरोना रुग्ण संख्येच्या पार्श्वभूमीवर राज्य सरकारने मागील काही दिवसापूर्वी नवे नियम जारी केले होते. त्यात जमावबंदी लागू केली होती. परंतु चाळीसगावमध्ये या नियमाला केराची टोपली दाखवली आहे. छत्रपती शिवाजी महाराजांच्या अश्वारूढ पुतळ्याच्या अनावरणप्रसंगी जिल्हा आपत्ती व्यवस्थापन प्राधिकरणाच्या आदेशाचे उल्लंघन केल्याने भाजपचे खासदार उन्मेष पाटील, आमदार मंगेश चव्हाण, नगराध्यक्षा आशालता चव्हाण यांच्यासह नगरसेवक व इतर चार ते पाच हजार जणांविरुद्ध चाळीसगाव शहर पोलिस ठाण्यात गुन्हा दाखल झाला आहे.
छत्रपती शिवाजी महाराज यांच्या अश्वारूढ पुतळ्याचे अनावरण व लोकार्पण बुधवारी चाळीसगाव येथे झाले. शिवरायांच्या अश्वारुढ पुतळ्याच्या अनावरणा कार्यक्रमानंतर दुपारी दोन ते चार वाजेदरम्यान जाहीर सभा आयोजित करण्यात आली होती. या सभेस परवानगीपेक्षा जास्त जनसमुदाय जमा केला. अटी -शर्तीचा भंग केला व सोशल डिस्टनसिंगचे पालन केले नाही, म्हणून खासदार उन्मेष पाटील, आमदार मंगेश चव्हाण, नगराध्यक्षा आशालता चव्हाण, भाजपा शहराध्यक्ष घृष्णेश्वर पाटील, राजेंद्र चौधरी, संजय रतनसिंग पाटील, संजय भास्कर पाटील, नितीन पाटील, शेख चिरागउद्दीन रफिक उद्दोन शेख, चंद्रकांत तायडे, फकिराबेन मिर्झा, कैलास पाटील यांच्यासह चार ते पाच हजाराच्या जमावाविरुद्ध गुन्हा दाखल करण्यात आला आहे.
दरम्यान, पोलिस नाईक पंढरीनाथ पवार यांच्या फिर्यादीवरून हा गुन्हा दाखल करण्यात आला. पुढील तपास पोलीस निरीक्षक के.के.पाटील यांच्या मार्गदर्शनाखाली सहाय्यक पोलीस निरीक्षक सचिन कापडणीस करीत आहेत.
