जामनेर, (प्रतिनिधी)- भुसावळ – जामनेर रस्त्यावर गारखेडा गावाच्या जिनींग जवळ लाकडाने भरलेल्या ट्रकने प्रवासी वाहून नेणार्‍या पॅजो रिक्षाला समोरून दिलेल्या जोरदार धडकेत दोन जण जागीच ठार झाले असून चार जण गंभीर आहेत. आज सकाळी ८ वाजेच्या सुमारास हा अपघात झाला, घटनेची माहिती मिळताच भाजपा नेते आमदार गिरीश महाजन घटनास्थळी पोहचले.
प्राप्त माहिती अशी की, लाकडाने भरलेला आयशर ट्रक (क्रमांक एचएच १९- ६०४३ ) हा जामनेरकडून भुसावळ कडे भरधाव वेगाने जात होता. तर समोरून प्रवाशांनी भरलेली रिक्षा येत होती. गारखेडा या गावाजवळ भरधाव वेगाने येणार्‍या ट्रकने पॅजो रिक्षाला जोरदार धडक दिली. यात दोन जण जागीच ठार झाले असून दहापेक्षा जास्त प्रवासी जखमी झाले आहेत. यातील चौघांची प्रकृती गंभीर असल्याने त्यांना तातडीने जळगाव येथे हलविण्यात आले आहे.
