मुंबई: महाराष्ट्राचं आराध्य दैवत असलेल्या श्री गणरायचं आज गणेश चतुर्थीच्या मुहूर्तावर घरोघरी आगमन झालं. गणपती बाप्पा मोरया आणि ढोल-ताशांच्या गजरात लाडक्या गणरायाचं आबालवृद्धांनी स्वागत केलं. श्रींची विधीवत प्रतिष्ठापना करण्यात आली. या निमित्तानं अवघा महाराष्ट्र भक्तिरसात चिंब झाला असून पुढील दहा दिवस हा जल्लोष पाहायला मिळणार आहे.
महाराष्ट्राचा महाउत्सव असलेल्या गणेशोत्सवाला आजपासून सुरुवात झाली. पहाटेपासूनच बाप्पाला घेऊन जाण्यासाठी मूर्तीशाळांमध्ये रांगा लागल्या होत्या. जिकडं-तिकडं पारंपरिक वेषातील अनवाणी पावलांची लगबग दिसत होती. नातवंडांसोबत आजी-आजोबांचा उत्साहही ओसंडून वाहत होता. बाप्पाची मूर्ती हातात येताच ’मोरया’चा गजर टीपेला पोहोचत होता. कुणी पाटावरून, कुणी डोक्यावरून, कुणी दुचाकीवर, कुणी रिक्षाने तर कुणी स्वत:च्या खासगी वाहनांनी बाप्पांना घरी आणले.
कुटुंबातील काही सदस्य बाप्पांना आणण्यासाठी घराबाहेर पडले असताना इकडे घरात वडीलधार्‍यांची सजावटीची लगबग सुरू होती. प्राणप्रतिष्ठेसाठी गुरुजींची धावपळ सुरू होती. काही छोट्या सार्वजनिक मंडळांनीही आज बाप्पाची प्रतिष्ठापना केली. त्यामुळं गल्लोगल्ली जल्लोष पाहायला मिळाला.
