नवी दिल्ली : राज्यात ऑक्सिजन तुटवडा भरून काढण्यासाठी आता भारतीय रेल्वेची ‘ऑक्सिजन एक्सप्रेस’ धावणार असल्याची माहिती रेल्वे मंत्रालयाने ट्विट करून दिली आहे.
कोरोनाच्या अनुषंगाने ऑक्सिजनच्या तातडीच्या वाहतुकीसाठी रेल्वेची ऑक्सिजन एक्सप्रेस धावणार आहे. प्राप्त माहिती नुसार कळंबोली स्टेशनवरून उद्या म्हणजेच १९ एप्रिल रोजी विशाखापट्टणमला ही ऑक्सिजन एक्सप्रेस रवाना होईल. यावेळी महाराष्ट्रातून दहा टँकर जाणार असून रेल्वेची लिक्विड मेडिकल ऑक्सिजन आणि ऑक्सिजन सिलेंडर नेण्यासाठी पूर्ण तयारी झाली आहे.
ऑक्सिजन एक्सप्रेसच्या वाहतुकीसाठी ग्रीन कॉरिडोर तयार केला जाणार आहे. कळंबोली रेल्वे स्टेशनहून दहा रिकामे टँकर्स वायझॅक, जमशेदपूर, रौरकेला, बोकारो येथे रवाना होणार आहेत. तेथून ऑक्सिजन भरुन पुन्हा ऑक्सिजन एक्सप्रेस महाराष्ट्रात दाखल होणार असल्याचं समजतं.
