जळगाव – लहान मुलांच्या कलागुणांना वाव मिळण्यासाठी व उद्याचे कलावंत घडण्यासाठी महाराष्ट्र शासनाच्या सांस्कृतिक कार्य संचालनालयामार्फत दरवर्षी महाराष्ट्र राज्य बालनाट्य स्पर्धा घेण्यात येते. दरवर्षीप्रमाणे यंदाही 17 व्या महाराष्ट्र राज्य बालनाट्य स्पर्धेचे आयोजन जळगाव केंद्रावर आज (दि.6) पासून सुरुवात होणार आहे.
छत्रपती संभाजीराजे नाट्यगृहात होणार असलेल्या या स्पर्धांचे उद्घाटन सकाळी 9.30 वाजता होणार आहे. कार्यक्रमाला अध्यक्ष म्हणून जिल्हाधिकारी डॉ.अविनाश ढाकणे तर अप्पर पोलीस अधीक्षक भाग्यश्री नवटके, अखिल भारतीय नाट्य परिषद जळगाव जिल्हा शाखेच्या अध्यक्षा रोहिणी खडसे खेवलकर, नाट्य परीनिरीक्षण मंडळ सदस्या डॉ.शमा सराफ व परीक्षकांची प्रमुख उपस्थिती असणार आहे. जळगाव शहरातील पहिले बालनाट्य सादर करणारे रंगकर्मी चिंतामण पाटील यांच्या हस्ते स्पर्धेचे उद्घाटन करण्यात येणार आहे.
स्पर्धेत जळगाव, भुसावळ, चाळीसगाव, अमळनेर व इंदौर येथील 25 बालनाट्ये सादर होणार आहेत. स्पर्धेकरिता प्रवेश विनामूल्य आहे. या स्पर्धेचा आस्वाद घेण्यासाठी व बालकलाकारांना प्रोत्साहित करण्यासाठी रसिक प्रेक्षकांनी दि. 6 जानेवारी ते दि. 9 जानेवारी दरम्यान सकाळी 9.30 ते सायं. 6.00 दरम्यान आपली उपस्थिती द्यावी, असे आवाहन सांस्कृतिक कार्य संचालक विभीषण चवरे व जळगाव केंद्र समन्वयक सरिता खाचणे यांनी केले आहे.
