जळगाव, (प्रतिनिधी) – छत्रपती शिवाजी महाराज व त्यांच्या जीवाला जीव देणारे सहकारी मावळ्यांच्या प्रेरणादायी स्मृती आज गड-किल्ल्यांच्या रुपात चिरस्मरणीय असून आपल्याला सतत स्फुर्ती देत आहेत.
छत्रपती शिवाजीमहाराजांच्या अलौकिक स्मृती जागविणार्‍या तसेच त्यांच्या पराक्रमाचे क्षितीज महाराष्ट्राबाहेर रुंदावणार्‍या किल्ले ग्वाल्हेरची प्रतिकृती यावर्षी चिमुकल्यांनी साकारली आहे.
जळगाव येथील नूतन अजिंठा हौसिंग सोसायटी,गिरणा टाकीच्या मागे येथे श्रीवरद सुतार, अंकित पाटील, अथर्व शिंदे, लक्षिता पाटील, शंभू शिंदे आदी चिमुकल्यांनी किल्ले ग्वाल्हेर हुबेहुब साकारुन या अविस्मरणीय स्मृतींचे दर्शन घडविले.
त्यांना सौ. सुनिता पाटील, सौ. भाग्यश्री पाटील यांनी मार्गदर्शन केले.
मागील काही वर्षांपासून या चिमुकल्यांनी स्वराज्याची राजधानी किल्ले रायगड, स्वराज्याचा मुकूटमणी किल्ले प्रतापगड तसेच किल्ले देवगिरी यांच्या प्रतिकृती सातत्याने साकारल्या आहेत.
