पाचोरा,(किशोर रायसाकडा) – पाचोरा – भडगाव विधानसभा मतदार संघात राजकीय वातावरण चांगलचं तापलं असून भाजपाचे अमोल शिंदे यांनी निवडणुक लढविण्याचा ‘निर्धार‘ केला असल्याचं खुद्द त्यांनीच ‘नजरकैद‘ च्या प्रतिनिधीशी बोलतांना केला आहे.गेल्या विधानसभा निवडणुकीत शिवसेना आमदार किशोरअप्पा पाटील यांना अमोल शिंदे यांनी तगडी लढत दिली होती त्यात आमदार किशोरअप्पा पाटील यांना विजय मिळाला होता. त्यानंतर भाजपने या मतदार संघात शिवसेनेला मदत केली नाही अशी तक्रार शिवसेनेकडून करण्यात आली होती आता पुन्हा तिचं पुनःवृत्ती होणार असून अमोल शिंदे निवडणूक लढविण्यावर ठाम राहिल्यास आमदार किशोरअप्पा पाटील यांची डोकेदुखी वाढणार आहे.
नुकताच आमदार किशोरअप्पा पाटील यांनी पाचोरा येथे ‘निर्धार मेळावा’ आयोजित केला होता. या कार्यक्रमाला शिवसेना शिंदे गट पक्षाचा मित्र पक्ष असलेल्या भाजपाच्या नेत्यांनी व पदाधिकारी, कार्यकर्त्यांनी दांडी मारल्याने या मतदार संघात भाजपा नेमका काय निर्धार करत असल्याची चर्चा होतं असताना पाचोरा तालुका भाजपाचे नेतृत्व करणारे अमोल शिंदे यांनी मी शंभर टक्के निवडणूक लढणार असल्याचं स्पष्ट केलं आहे. यामुळे राजकारण चांगलंच तापलं आहे.
दरम्यान अमोल शिंदे यांना आपण आमदार किशोरअप्पा पाटील यांनी आयोजित केलेल्या ‘निर्धार मेळाव्याला’ उपस्थित नसल्याबाबत विचारणा केली असता या कार्यक्रमाचा आपल्याला निरोप नसल्याचं देखील त्यांनी सांगितलं असून यावरून विधानसभा निवडणूक आधीच पाचोरा भडगाव मतदार संघात महायुतीमध्ये दुफडी दिसून आली.
गेल्या पाच वर्षात आमदार किशोरअप्पा पाटील यांनी मतदार संघात भाजापाचे पदाधिकारी सहकार्य करत नसल्याच्या तक्रारी स्वपक्षाकडे व भाजपाच्या वरिष्ठ नेत्यांकडे केल्या मात्र त्याचा काही एक फायदा झालेला दिसून येतं नाही. आता जवळच असलेल्या विधानसभा निवडणुकीत भाजपा शिवसेना पक्षाचे वरिष्ठ नेते कसा तोडगा काढतात याकडे सर्वच सर्वांचेच लक्ष लागून आहे.
