जयपूरः – २१ व्या शतकात भारताची सर्वात मोठी शक्ती असलेल्या तरुणांना रोजगार देण्याऐवजी केंद्रातील मोदी सरकार त्यांना बेरोजगारीकडे ढकलत आहे. विद्यार्थ्यांनी प्रश्न विचारल्यानंतर त्यांच्यावर गोळी घालण्याचे काम मोदी सरकारकडून होत आहे, त्यामुळे देशातील तरुणांना बेरोजगारीचे स्वप्न पडत असल्याचा गंभीर आरोप काँग्रेस नेते राहुल गांधी यांनी आज केला. राजस्थानमधील जयपूरमधील युवा आक्रोश रॅलीत राहुल गांधी बोलत होते.
राहुल गांधी यांनी केंद्रातील मोदी सरकारवर सडकून टीका केली. आज अन्य देशातील लोक भारतात गुंतवणूक करीत नाहीत. कारण या ठिकाणी हिंसाचार होत आहेत. केंद्र सरकार देशात हिंसाचार पसरवत आहे. त्यामुळे अन्य देशातील लोक भारतात कशाला गुंतवणूक करतील?, असा सवाल राहुल गांधी यांनी केला आहे. नरेंद्र मोदी यांनी भारताची एकताची भावना तोडण्याचे काम केले आहे. याआधी लोक पाकिस्तानात हिंसाचार होत आहे, असे म्हणायचे परंतु, आता तेच लोक भारतात हिंसाचार होतोय असे म्हणतात. नरेंद्र मोदी यांच्यामुळे भारताची परिस्थिती बिघडली आहे. जगात भारताला रेप कॅपिटल म्हटले जात आहे, याला मोदी सरकार जबाबदार आहे, असा आरोपही राहुल गांधी यांनी केला आहे.
प्रत्येक देशाकडे काहींना काही गुंतवणूक असते. भारताकडे सर्वात मोठी गुंतवणूक ही देशातील तरुण आहेत. शस्त्रामध्ये आपण अमेरिकेचा सामना करू शकत नाही. परंतु, आपल्याकडे जगातील सर्वात हुशार तरुण आहेत, असे राहुल गांधी म्हणाले. अन्य देशातील लोक भारतात गुंतवणूक करतात कारण त्यांचा या देशातील तरुणांवर विश्वास आहे. परंतु, २१ व्या शतकात भारत आपली शक्ती नष्ट करीत आहे. तरुणांना रोखण्याचे काम मोदी सरकार करीत आहे. तरुणांना बेरोजगारीचे स्वप्न पडत आहेत. विद्यापीठातील विद्यार्थी सरकारला प्रश्न विचारत आहे. परंतु, त्यांच्या प्रश्नांचे उत्तर देण्याऐवजी मोदी सरकार त्यांच्यावर हल्ला करीत आहे. एका धर्माला दुसऱ्या धर्मासोबत लढावे लागत आहे. हा तिरंग्याचा अपमान होत आहे. भारतात एक कोटी तरुणांनी रोजगार गमावला आहे. मोदी सरकार CAA-NRC-NPR वर चर्चा करते, परंतु, रोजगारावर काहीच बोलत नाही, असेही राहुल गांधी म्हणाले.
