मुंबई – महाविकास आघाडीच्या स्थापनेत महत्त्वाची भूमिका बजावणारे शिवसेनेचे नेते, संजय राऊत यांनी आजच्या शपथविधी सोहळ्याला दांडी मारल्यानं सर्वांच्याच भुवया उंचावल्या आहेत. धाकटे बंधू आमदार सुनील राऊत यांना मंत्रिमंडळात स्थान न मिळाल्यानं ते नाराज असल्याची चर्चा आहे. इतकंच नव्हे, सुनील राऊत हे राजीनामा देण्याच्या तयारीत असल्याचंही बोललं जात आहे.
शिवसेना, राष्ट्रवादी व काँग्रेसच्या महाविकास आघाडीचं सरकार स्थापन होण्यात संजय राऊत यांचा मोलाचा वाटा होता. सरकार स्थापनेच्या संपूर्ण प्रक्रियेत ते सुरुवातीपासून सक्रिय होते. शरद पवारांशी त्यांची असलेली जवळीक सरकार स्थापनेमध्ये महत्त्वाची ठरली असल्याचंही बोललं जातं. त्यामुळं महाविकास आघाडीच्या सरकारमध्ये त्यांचे बंधू आमदार सुनील राऊत यांना मंत्रिपद मिळेल, अशी चर्चा होती. मात्र, शिवसेनेनं तीन अपक्षांना संधी दिल्यानं सुनील राऊत यांचं नाव मागे पडलं. त्यामुळं ते नाराज असल्याचं बोललं जात होतं. अर्थात, ही चर्चा त्यांनी फेटाळली होती. मात्र, शपथविधी सोहळ्याला दांडी मारल्यानं त्यांच्या नाराजीची चर्चा पुन्हा रंगली आहे.
शिवसेनेचे एक महत्त्वाचे नेते म्हणून संजय राऊत शपथविधी सोहळ्याला उपस्थित राहणं अपेक्षित होतं. मात्र, ते विधानभवनाकडं फिरकले नाहीत. त्यांचे बंधू सुनील राऊतही मुंबई बाहेर असून त्यांचा फोनही लागत नसल्याचं समजतं. कार्यकर्त्यांनी दिलेल्या माहितीनुसार, ते नाराज असून राजीनामा देण्याच्या निर्णयाप्रत आले आहेत. आता उद्धव ठाकरे त्यांची नाराजी कशी दूर करणार, हे पाहणं महत्त्वाचं ठरणार आहे.
