नवी दिल्ली: महाराष्ट्रातील सत्तास्थापनेवरून भाजपसोबत काडीमोड घेतलेली शिवसेना आता एनडीएतून बाहेर पडली आहे. संसदेतील दोन्ही सभागृहांत म्हणजेच, लोकसभा आणि राज्यसभेत शिवसेनेचे खासदार विरोधी पक्षात बसणार आहेत. ते विरोधी पक्षांच्या बाकावर बसतील, अशी संसदीय कामकाज मंत्री प्रल्हाद जोशी यांनी आज प्रसारमाध्यमांना दिली.
महाराष्ट्रात सत्तापेच कायम आहे. मुख्यमंत्रिपद आणि सत्तेत समान वाटा यावरून भाजप-शिवसेना युतीत बिनसलं. शिवसेना आता राष्ट्रवादी आणि काँग्रेससह राज्यात सरकार स्थापन करणार असल्याचं जवळजवळ निश्चित झालं आहे. या तिन्ही पक्षांच्या नेत्यांनी किमान समान कार्यक्रमावर चर्चा देखील सुरू झाली आहे. दुसरीकडे, मोदी मंत्रिमंडळातील शिवसेनेचे एकमेव मंत्री असलेले अरविंद सावंत यांनीही गेल्या सोमवारी पदाचा राजीनामा दिला आहे. ‘अरविंद सावंत यांनी मंत्रिपदाचा राजीनामा दिला आहे. एनडीएच्या बैठकीलाही ते उपस्थित राहिले नाहीत. त्यामुळं ते एकप्रकारे एनडीएतूनच बाहेर पडले आहेत. सहाजिकच, त्यांना लोकसभा आणि राज्यसभेत विरोधी पक्षांच्या बाकावर बसवले जाईल, असं ते म्हणाले. सर्वपक्षीय बैठकीनंतर त्यांनी माध्यमांना ही माहिती दिल्याचं वृत्त पीटीआयनं दिलं आहे. सूत्रांच्या माहितीनुसार, शिवसेनेच्या राज्यसभेतील तिन्ही सदस्यांना विरोधी पक्षाची आसने देण्यात आली आहेत. लोकसभेत आसन व्यवस्था वाटपाची प्रक्रिया सुरू आहे.
शिवसेनेच्या दोन्ही सदनातील खासदारांना सत्तापक्षाची जागा देण्यात आली होती. मात्र, महाराष्ट्रातील सत्तास्थापनेवरून भाजप-शिवसेनेत बिनसलं आणि शिवसेना जवळजवळ एनडीएतून बाहेर पडल्याचं म्हटलं जात होतं. मात्र, त्याबाबत भाजप किंवा शिवसेनेच्या नेत्यांनीही अधिकृत घोषणा केलेली नव्हती. संसदेत बसण्याची जागा बदलली असल्याची माहिती मिळाल्याचं संजय राऊत यांनीही सांगितलं होतं. शिवसेना एनडीएतून बाहेर पडण्याची फक्त औपचारिकता बाकी आहे, असं ते म्हणाले होते. मात्र, आता भाजप नेते आणि संसदीय कामकाज मंत्री प्रल्हाद जोशी यांनीच या वृत्ताला दुजोरा दिला आहे. ‘संसदेच्या दोन्ही सभागृहांमधील शिवसेनेच्या खासदारांची आसनव्यवस्था बदलण्यात आली आहे. त्यांची व्यवस्था विरोधी पक्षात केली आहे,’ असं त्यांनी सांगितलं. त्यामुळं आता शिवसेना एनडीएतून बाहेर पडली आहे, यावर शिक्कामोर्तब झालं आहे.
