नाशिक – राज्यातील रंगलेल्या सत्तानाट्यात मुख्यमंत्र्यांच्या शपथवेळी अजितदादांसोबत सिन्नरचे आमदार माणिकराव कोकाटे हे देखील उपस्थित होते. राजभवनावर झालेल्या या प्रसंगी राष्ट्रवादीच्या 15 आमदारांची उपस्थिती होती. त्यात धनंजय मुंडे यांच्यासह नाशिकमधून दिलीप बनकर आणि नरहरी झिरवाळ यांची उपस्थिती देखील महत्वाची मानली गेली. बनकर हे शरद पवार यांचे निकटवर्तीय मानले जातात. त्यामुळे अजितदादांसोबतची त्यांची उपस्थिती राजकीय निरीक्षकांच्या भुवया उंचावणारी ठरली आहे.
कोकाटे यांची भूमिका नेहमीप्रमाणेच बंडखोरीची राहिली असून शपथविधी आटोपल्यावर ते अखेरपर्यंत अजितदादांसोबत होते. या घडामोडीत त्यांच्याशी प्रतिक्रिया घेण्यासाठी संपर्क साधला असता सकाळी 11 वाजेपर्यंत त्यांचा भ्रमणध्वनी व्यस्त असल्याचे दाखवत होता. त्यानंतर मात्र कोकाटे नॉट रिचेबल झाले. शपथविधी आटोपल्यावर राजभवनावर राष्ट्रवादीचे आणखी तीन आमदार पवार यांना येऊन भेटले.
