मुंबई – तरुणाईला वेड लावणाऱ्या टिकटॉक अॅपवर नेहमी एखाद्या व्हिडिओचा ट्रेंड सुरू असतो. सध्या ‘आला वारा, गेला वारा…’चा ट्रेंड सुरू आहे. टिकटॉकच्या ट्रेंडची तरुणाईमध्येही जोरदार आहे. याच ट्रेंडचा वापर राजकीय टीकेला प्रत्युत्तर देण्यासाठी करण्यात येत आहे. काँग्रेस प्रवक्ते सचिन सावंत यांनी याच ट्रेंडचा आधार घेत विरोधी पक्षनेते देवेंद्र फडणवीस यांच्यावर टीका केली आहे.
विरोधी पक्षनेते देवेंद्र फडणवीस यांच्याकडून राज्यात सत्तेवर असलेल्या शिवसेना, राष्ट्रवादी आणि काँग्रेसवर जोरदार टीका सुरू असते. या तीन पक्षांच्या महाविकास आघाडीचा उल्लेख सातत्याने तीन चाकांची रिक्षा असा केला जातो. नुकत्याच पार पडलेल्या विधीमंडळाच्या हिवाळी अधिवेशनात त्यांनी ही आघाडी तीन चाकांची रिक्षा असल्याचा उल्लेख केला होता. त्यांच्या टीकेला मुख्यमंत्री उद्धव ठाकरे यांनीही पलटवार करत उत्तर दिले होते.
त्यानंतरही विरोधकांकडून सातत्याने तीन चाकांची रिक्षा असा महाविकास आघाडीचा उल्लेख करत हेटळणी सुरू आहे. त्याला काँग्रेसकडून प्रत्युत्तर देण्यात येत आले आहे. काँग्रेसचे प्रदेश सरचिटणीस आणि प्रवक्ते सचिन सावंत यांनी ट्विटरवर विरोधी पक्षनेते देवेंद्र फडणवीस यांच्यावर टीका केली आहे. ही टीका करताना त्यांनी टिकटॉकवरील ‘आला वारा, गेला वारा…’ ट्रेंडचा आधार घेतला आहे.
