नवी दिल्ली – राजधानी दिल्लीत काँग्रेस-राष्ट्रवादीच्या नेत्यांचे महाराष्ट्रातील सत्तापेचावर बैठकांचं सत्र सुरू असतानाच काँग्रेस नेते विजय वडेट्टीवार यांनी महाराष्ट्राचा आगामी मुख्यमंत्री शिवसेनेचाच होणरा असल्याचं स्पष्ट केलं आहे. त्यामुळे राज्यात शिवसेनेच्याच नेतृत्वाखालील सरकार येण्याची शक्यता बळावली असून शिवसेना-राष्ट्रवादीमधील मुख्यमंत्रिपदाच्या अडीच अडीच वर्षाच्या फॉर्म्युल्यातील हवाच निघून गेली आहे.
राष्ट्रवादी काँग्रेसचे अध्यक्ष शरद पवार यांच्या दिल्लीतील निवासस्थानी काँग्रेस आणि राष्ट्रवादीच्या नेत्यांची दोन दिवसांपासून बैठक सुरू आहे. या बैठकीत आघाडीचा किमान समान कार्यक्रम आणि सत्ता वाटपाच्या सूत्रांवर चर्चा झाल्याचं समजतं. त्याच दरम्यान, शिवसेने आणि राष्ट्रवादीमध्ये अडीच अडीच वर्षासाठी मुख्यमंत्रिपद वाटून घेण्याचा फॉर्म्युलाही तयार झाल्याचं वृत्त धडकलं होतं. त्यामुळे शिवसेनेकडे पाच वर्षासाठी मुख्यमंत्रिपद जाणार नसल्याचं सांगण्यात येत होतं. मात्र ही चर्चा सुरू असतानाच विजय वडेट्टीवार यांनी त्यावर भाष्य करून फिफ्टी-फिफ्टीच्या फॉर्म्युल्यातील हवाच काढून टाकली आहे. दरम्यान, काँग्रेस-राष्ट्रवादीच्या अन्य नेत्यांनी सत्तेच्या फॉर्म्युल्यावर भाष्य करणं टाळलं आहे. इतकंच नव्हे तर दोन्ही पक्षातील किमान समान कार्यक्रमावरही त्यांनी बोलणं टाळलं आहे. शिवसेनेशी चर्चा केल्यानंतरच तिन्ही पक्ष एकत्रित पत्रकार परिषद घेऊन त्यावर भाष्य करणार असल्याचं काँग्रेस नेते पृथ्वीराज चव्हाण यांनी स्पष्ट केलं आहे. त्यामुळे या महाआघाडीच्या फॉर्म्युल्याचा सस्पेन्स उद्याच संपणार असल्याचे संकेत मिळत आहेत.
