कजगाव ता.भडगाव- उमेद अर्थात महाराष्ट्र राज्य ग्रामीण जीवनोन्नती अभियाना मार्फत तालुक्यात महिला बचत गट तयार करून त्यांना अभियानाचे दहा सूत्रानुसार बचत गट चालवण्यास मदत होत आहे. या दहा सूत्रांचा एक भाग आरोग्य आहे .महिला बचत गटातील स्तनदा माता गरोदर माता तसेच कुटुंबातील सर्व सदस्यांना पोषण आहार मिळण्याकरिता तसेच त्यांच्या अन्न आरोग्य व स्वच्छता विषयी काळजी घेण्याकरिता महिला बचत गटातील महिलांना गंगा मॉडेल या पद्धतीने परसबाग तयार करण्याचे काम संपूर्ण भडगाव तालुक्यात सुरू आहे.
परसबाग तयार करण्याचे संपूर्ण तालुक्याला एकूण २१० एवढे उद्दिष्ट आलेले असून त्यापैकी संपूर्ण भडगाव तालुक्यातील ग्रामीण भागात २५ जून ते १५ जुलै पर्यंत २५० गंगा मॉडेल परसबाग तयार करून उद्दिष्ट प्राप्ती करण्यात आलेली आहे. लॉक डाऊन च्या काळात ग्रामीण भागात भाजीपाला देखील मिळणे अवघड काम होते व जे मिळत होते ते देखील चढ्या भावाने मिळत होते अशा काळात पुढे भविष्यात या परसबागा नक्कीच ग्रामीण भागातील महिलांना घरच्या घरी चांगला स्वच्छ व निरोगी असा भाजीपाला मिळून त्यांच्या आरोग्याची उत्तम देखभाल ठेवण्यास मदत होईल.
अभियानाच्या कामकाजा करिता जिल्हास्तरीय वरून जिल्हा ग्रामीण विकास यंत्रणा जळगाव चे प्रकल्प संचालक श्री डॉ.पी.सी. शिरसाठ यांच्या मार्गदर्शनाखाली व श्रीमती दिपाली कोतवाल गटविकास अधिकारी पंचायत समिती भडगाव यांच्या मार्गदर्शनाखाली श्री प्रशांत महाले तालुका अभियान व्यवस्थापक पंचायत समिती भडगाव व श्री प्रशांत परदेशी प्रभाग समन्वयक हे महिला बचत गटांना योग्य मार्गदर्शन करून कामकाज करीत आहेत.
