बेंगळुरू- महाराष्ट्रात भाजपला जोरदार धक्का देत शिवसेनेने काँग्रेस आणि राष्ट्रवादी काँग्रेसला सोबत घेऊन सत्तास्थापनेसाठी मोर्चेबांधणी सुरू केली आहे. महाराष्ट्रातील या राजकीय उलथापालथीवर अनेक मतमतांतरे पाहायला मिळत असताना माजी पंतप्रधान एच. डी. देवेगौडा यांनी अत्यंत स्पष्ट शब्दांत शिवसेनेच्या भूमिकेचं समर्थन केलं आहे व काँग्रेसलाही महत्त्वाचा असा सल्ला दिला आहे.
हिंदुत्वाचा समान धागा घेऊन देशात सर्वाधिक काळ टिकलेली भाजप आणि शिवसेना या दोन पक्षांची युती आता जवळपास संपुष्टात आल्याचे दिसत आहे. युती तुटल्याची अधिकृत घोषणा झालेली नसली तरी शिवसेनेचे केंद्रातील मंत्री अरविंद सावंत यांनी आज राजीनामा दिल्याने त्यासोबतच शिवसेनेने भाजपसोबतचे राज्यातले आणि केंद्रातले नाते तोडल्याचे स्पष्ट झाले आहे. शिवसेना हा एनडीएतील सर्वात जुना घटकपक्ष आहे. सावंत यांच्या राजीनाम्यामुळे आता शिवसेना एडीएचा घटक नसेल, हे ही स्पष्टच आहे. या पार्श्वभूमीवर देवेगौडा यांच्या विधानाला महत्त्व आहे. बाळासाहेब ठाकरे यांनीच भाजपला महाराष्ट्रात स्थान दिल्याची आठवण देवेगौडा यांनी करून दिली आहे. अटलबिहारी वाजपेयी आणि लालकृष्ण आडवाणी हे भाजपचे ज्येष्ठ नेते तेव्हा बाळासाहेबांच्या घरी युतीचा प्रस्ताव घेऊन गेले होते. काही जागा भाजपला सोडाव्या, अशी विनंती त्यांनी केली होती. त्यातूनच शिवसेना-भाजप युती झाली होती. मात्र भाजपला आज त्याचा विसर पडला आहे. म्हणूनच उद्धव ठाकरे यांनी भाजपला धडा शिकवण्यासाठी टोकाचे पाऊल उचलले आहे, असे देवेगौडा यांनी नमूद केले.
महाराष्ट्रातील सध्याची राजकीय स्थिती लक्षात घेऊन काँग्रेसने शिवसेनेला पाठिंबा दिला तर पुढची पाच वर्षे स्थिर सरकार देण्याचा प्रयत्न राहायला हवा. सरकार अस्थिर होईल, असे कोणतेही पाऊल काँग्रेसकडून उचलले जाऊ नये. काँग्रेसला पुन्हा जनतेचा विश्वास संपादन करायचा असेल तर त्यांनी तसं वागायला हवं, असा सल्ला देवेगौडा यांनी दिला.
दरम्यान, कर्नाटकात भाजपला सत्तेपासून दूर ठेवण्यासाठी देवेगौडा यांचे पुत्र कुमारस्वामी यांच्या नेतृत्वाखाली सरकार स्थापन करण्यात आले होते. काँग्रेसच्या पाठिंब्यावर हे सरकार स्थापन झालं होतं. मात्र, फोडाफोडीच्या राजकारणामुळे हे सरकार अल्पजीवी ठरलं. काँग्रेस व जेडीएसचे आमदार फुटल्याने कुमारस्वामी यांनी बहुमत गमावलं आणि भाजपने कर्नाटकची सत्ता काबीज केली. कर्नाटकातील सत्तांतराचे हे नाटक ताजे असल्याने व त्याचा एक प्रमुख भाग असल्यानेच देवेगौडा यांनी महाराष्ट्रातील सत्तास्थापनेच्या जुळवाजुळवीत काँग्रेसला दिलेला सल्ला फार महत्त्वाचा आहे.
